Рустам Саидов: Поветкин билан жанг қилиш услубимиз ўхшаш
Ads

Ўзбек боксининг ёрқин намоёндаларидан бири, Энтони Жошуанинг мағлубияти ҳақида фикр билдирди.

Ҳаваскор рингда икки карра Осиё чемпиони, икки карра Осиё ўйинлари ғолиби, жаҳон чемпионати бронза медали соҳиби, Сидней олимпиадаси бронза медали эгаси, Ўзбекистон Республикасида хизмат кўрсатган спортчи Рустам Саидов билан суҳбатни ҳавола қиламиз.

- Рустам ака, муборак Рамазон ойи якунланиб бормоқда. Бу ойда одатий машғулотларни ўтказиш бироз мураккаблашгани боис, алоҳида ёндашув талаб этилади. Боксчиларнинг машғулот жараёнига қандай ўзгартириш киритилди?

- Рамазон ойи давомида боксчиларимизнинг ўзини яхши ҳис қилаётганларини, белгиланган юкламаларни қийинчиликсиз бажараётганларини инобатга олган ҳолда, машғулотлар жараёнига ўзгартириш киритмасликка қарор қилдик. Уч босқичдан иборат ўқув-йиғин машғулотлари кўнгилдагидек давом этмоқда.

- Ҳалиям шуғулланиб турасизми? Спорт формангиз ҳозир қандай?

- Ўзим мунтазам спорт формамни сақлашга ҳаракат қиламан. Ҳар куни эрталабки бадантарбияни учта асосий машқлардан бошлайман. Тана мушакларини бўшаштириш, ўтириб туриш ва албатта муштларни тугиб отжиманияни амалга ошираман. Кўринишидан оддий машқлар бўлишига қарамай, кун давомида танангизда тетикликни бир маромда сақлайди. Вазнимни ва спорт формамни доим назорат қилиб бораман.

- Боксда супер оғир вазн энг обрўлиси ҳисобланади. Профида эса уларга яхшигани гонорар тўлашади. Ҳаваскордаги бой тажрибангиз билан профессионалларга ўтишга нима тўсқинлик қилди?

- Ҳақиқатдан ҳам, ўта оғир вазн тоифаси ҳар жиҳатдан энг нуфузлиси саналади. Карера қилиш ва бизнес нуқтаи назаридан ҳам мўмайгина даромад қилиш мумкин. Тўғри, мен ҳаваскорларда яхши натижаларга эришганман. Бироқ, профессионал ва ҳаваскор бокс бир-биридан мутлақо фарқ қилади. Битта спорт тури бўлишига қарамай, тайёргарлик, бокс назарияси ва жанглар умуман бошқа форматда. Шунинг учун ҳаваскордаги натижаларим ўзим учун етарли деб билдим ва ортиқча таваккал қилмадим.

- Оғир вазнда катта сенсация бўлганидан хабарингиз бор. Мутлоқ жаҳон чемпиони, енгилмас Энтони Жошуа кутилмаганда нокаутга учради. Рақибнинг тана тузилиши, имкониятлари эса умуман атлетларга хос эмас. Беллашув ҳақидаги фикрингиз?

- Бокс олами учун кутилмаган натижа бўлди. Бокснинг моҳияти ва асл жозибаси ҳам ана шунда. Энди Руиснинг бўйи рақибиникидан анча пастлиги, мушакларининг боксчиларга хос ривожланмаганлиги ва тайёргарлик учун етарли вақт берилмаганини инобатга олиб, барча бокс экспертлари ва букмекерлар Жошуанинг ғалабасига шубҳа қилишмади. Руис гарчи кучли зарба ўтказиб юбориб, нокданга учраган бўлса ҳам, ўзини тиклаб, Энтонини 4 марта ерга қулатиши руҳан кучли эканлигини билдиради. У ҳақиқий матонат, совуққонлик кўрсатиб, имкониятдан зўр фойдалана билди. Бу бокс. Унда ҳамма нарса бўлиши мумкин.

- Россиялик бокс юлдузи Александр Поветкин билан ҳаваскордаги жаҳон чемпионатида жанг қилгансиз. Қайси жиҳатлари билан у сиздан устун келган?

- Мен Александр билан бундан анча аввал Австралиянинг Брисбен шаҳрида бўлган Яхши Ният Ўйинларида танишганман. Поветкин рингдаги совуққонлиги, мукаммал техникаси, ушлаган жойидан кесиши ва кучли зарбаси билан ажралиб турарди. Шунинг учун ҳам юқори натижаларга эришган. Саша билан менинг жанг олиб бориш услубимиз бир-бирига жуда ўхшаш.

- Издошингиз ва шогирдингиз Баҳодир Жалоловнинг зарбаси ва профидаги имкониятларини қандай баҳолайсиз?

- Баҳодир исми жисмига мос мард йигит. Америкага кетгач, ҳам жисмонан, ҳам маҳорат жиҳатидан сезиларли ўсишга эришди. Унинг келажаги порлоқ. Баҳодир ҳаваскорларда ҳам, профида ҳам ўз вазн тоифасининг энг зўр боксчиси бўлиши учун ҳар доим дуо қиламан.

- Бокс мухлисларига тилакларингиз?

- Эътиборингиз учун ташаккур. Доимо боксга ошно бўлинг ва кузатиб боришдан чарчаманг. Барчангизга мустаҳкам соғлик, аъло кайфият, шижоат ва бошлаган ишларингизга муваффақият тилайман!

Фазлиддин Ҳусниддинов суҳбатлашди