Саккиз футболчи терма жамоани тарк этди

Англия терма жамоасининг саккиз нафар футболчиси, жумладан, Англмя Премьер-лигаси пешқадами “Арсенал” вакилларидан Деклан Райс ва Букайо Сака ўқув-машғулот йиғинини тарк этди.

Ушбу халқаро танаффусда англияликлар бош мураббийи Томас Тухель 35 нафар футболчини чақирган бўлиб, улардан 11 нафарига Уругвайга қарши ўйинни ўтказиб юбориб, фақат Японияга қарши баҳсга келишига рухсат берган эди.

Айнан Райс ва Сака шу 11 нафар орасида эди, бироқ шанба куни терма жамоа тиббий штаби кўригидан ўтгандан сўнг, иккаласи ҳам ўз клубларига қайтди.

Шунингдек, Тухель Аарон Рамсдейл, Фикайо Томори, Адам Уортон ва Доминик Калверт-Левинни ҳам уйига жўнатди.

Бу рўйхатни яна икки ўйинчи тўлдирмоқда: Уругвайга қарши ўйинда тиззасини жароҳатлаган Нони Мадуэке ва ўтган жума куни “Уэмбли”даги ўйин олдидан машғулотда жароҳат олган Жон Стоунз (ўша ўйин 1:1 ҳисобида якунланган) ҳам ортга қайтган.

Шу тариқа, Daily Mail маълумотига кўра, сешанба куни Японияга қарши ўртоқлик ўйини учун Тухель ихтиёрида 27 нафар футболчи қолди.