Самвел Бабаяннинг лицензияси олиб қўйилди, журналист жабрдийда. Лекин асл айбдорчи?

Суперлига 18-туридан ўрин олган “Сўғдиёна” – “Навбаҳор” учрашувидан кейинги жараёнлар ҳали ҳам давом этмоқда. Жиззахдаги можаро катталашиб кетди ва шу билан бирга назаримизда асл айбдор четга чиқиб қолгандек.

Ҳаммаси нимадан бошланди. Матбуот анжумани хонаси стадион ичида эмаслиги боис, ташқарига чиқиб, ён томондаги хонага киришда мухлис ва Самвел Бабаяннинг тўқнашуви билан бошланди. Одатда бошқа стадионларда матбуот анжуманлари хонасига аренанинг ичидан кирилади.

Шу пайт бир мухлис Бабаянга ўз “дил изҳорлари”ни билдирди. Орада мураббийнинг онасидан келиб сўкинган ҳолат ҳам бўлди. Кейин бу мутахассисни қуйиш қонидан чиқарди. Миллий гвардия ходимлари тезда ўша мухлисни олиб кетди. Бу паллада Самвел Бабаяннинг кўзи матбуот анжумани хонасида чиқиб келган журналистга тушди. Журналист қўлидаги телефонда воқеани ёзиб олаётганди. У журналист эканлиги боис ҳар бир воқеа эътибордан четда қолишини истамаган бўлиши мумкин. Бейжиги бор журналистнинг бунга ҳақли.

Лекин масаланинг яна бир томони ҳам бор. Мураббийнинг яқинларини сўкиш. Агар унинг фаолиятини танқид қилиб, мураббийнинг ўзини сўкилганда Бабаян бу ҳолатга бундай реакция билдирмаган бўларди. Шунинг учун жаҳл устида журналистнинг телефонига ёзилган видеони ўчириб ташлаш буюрилган. Ким ҳам хоҳларди бундай ҳолатга тушиб қолганини интернетга чиқиб кетишини!?

Мураббийнинг ўрнида бошқаси бўлганда ҳам шундай иш қилган бўларди. Камида сиз ҳам. Ҳар ҳолда яқинларимиз қилмаган ишга пул тўламайдику, тўғрими? Шу боис мураббий қуйиш қонидан чиқиб, журналистга кескин муносабатда бўлди. Бабаяннинг айби бор. Уни шундай вазиятга солишгани учун ўзини тўхтата олмади. Лекин ўша гап, онасидан кетиб сўккан инсондан кейин бунинг иложи бўлмай қолиши деярли ҳаммада кузатилади.

Бу ерда журналистнинг иккита йўли бор эди. Биринчиси, бу ҳолатни қўлдан чиқармай съёмка қилиш. Иккинчиси, инсонийлик факторидан келиб чиқиб, кўз юмиш. У ҳам воқеани бошидан кўрмагани учун балки билмай телефонига ёзиб олгандир. Яна ким билади дейсиз.

Қолаверса, можаронинг асл сабабчиси мухлис ва у ўша ерда пайдо бўлгани. Бундай ўзига хос ўйинда рақиб жамоа вакилларимнинг хавфсизлиги юқори даражада таъминланиши лозим. Учрашув комиссари матбуот анжуманига ташқарига чиқиб кирилишини инобатга олиши керак эди. Шунда бундай ишлар бўлмасди. Мураббий тўғри матбуот анжуманига кириб кетаётганди. Бу ҳолатда комиссарга ҳам кўп нарса боғлиқ. Фақатгина журналистнинг телефони мажбуран ўчиртирилгани ва мураббийнинг лицензияси олиб қўйилгани билан кифояланмасдан стадиондаги видеоёзув орқали мухлиснинг расмий ҳудудга кириб келиши, уни назорат қилинмагани, бу ҳолатда комиссар қаерда эканлиги ҳам ўрганилиши лозим. Яна қайтараман, агар шу омиллар бўлмаганида можаро келиб чиқмасди. Бу эса масаланинг иккинчи томони ҳисобланади!

Бекзод ИСАЕВ