Санжар Шоаҳмедов: "Бу биз кутган ўйинимиз бўлди"

Мавсумни учта мағлубият билан бошлаган Самарқанднинг “Динамо” жамоаси 4-турда ниҳоят ўз мақсадига эришди.

Жиззахда “Динамо” “Металлург”ни қабул қилди ва қийин кечган баҳсда самарқандликлар 2:1 ҳисобида ғалабани қўлга киритди. Бунинг учун мардонавор курашган ва фаол ўйнаган “Динамо” ярим ҳимоячиси Санжар Шоаҳмедов Sports.uz учун ўз фикрлари билан ўртоқлашди.

- "Динамо" илк ғалабасини қўлга киритди. Аммо қийин кечгани рост. Баҳс сиз кутгандек кечдими?

- Бу ўйинга жиддий тайёрлангандик. Нимага десангиз “Металлург”га ҳам, бизга ҳам ғалаба ниҳоятда зарур эди. Рақиб жамоа ҳам фақат дуранг ўйнаётганди. Табиийки, бизга ҳам ғалаба жуда зарур эди. Биринчи ғалабани тезроқ бошлаш ва футболчилар бир-бирига ишончи ортиши учун ҳам уч очко муҳим эди. Айтишим лозимки, бу биз кутган ўйинимиз бўлди. Шиддатли, ҳужумкор кечди.

- "Металлург" майдонда бир футболчи кам бўлиб ўйнади ва бу ҳолат "Динамо"га қанчалик қўл келди? Агар қизил бўлмаганида ўйин сценарийси қандай кечарди, деб ўйлайсиз?

- Тўғри, майдонда 10 киши бўлиб тўп суриш барибир жамоага қийинчилик туғдиради. Бир ўйинчининг йўқлиги ҳар қандай клубга билинтиради. “Металлург” футболчиси майдондан четлатилгунга қадар ҳам 11 га 11 ўйнаётган чоғимизда аста-секин ташаббусни ўз қўлимизга олаётгандик. Тўғри, улар 10 киши бўлиб қолишгач, пенальтидан гол урдик. Кейин янада ҳужумни оширдик ва якунда ғалабага эришдик.

- Вадим Абрамовнинг кўрсатмаларини қанчалик бажардик, деб айта оласиз?

- Вадим Абрамовнинг кўрсатмасини барча ўйинчилар қўлидан келганича бор кучини бериб бажаришга ҳаракат қиляпти. Менимча, “Металлург”га қарши баҳсда ҳам айтган кўрсатмалари анча-мунча ўхшади.

- "Динамо" дастлабки учта ўйинда мағлубиятга учради. Бу жамоага қўшимча босим ўтказаётгани ростмиди ва "Металлург" билан баҳсда шу ҳолат халақит қилмадими?

- Ҳа, учта учрашувдан бери ғалаба қозона олмаётгандик. Ҳамма йигитлар масъулиятни сезиб туришганди. Қийин учрашув бўлишини ҳам билардик. Ҳамма йигитларда босим бор эди. Мухлислар ҳам, раҳбарият ҳам натижа сўраётгандилар. Шунинг учун ҳам жамоада ўзига яраша босим бор эди. Худога шукр, ғалаба қозониб уларни хурсанд қилдик. Албатта, бундай босимда тўп суриш қийин бўлади. “Металлург”га қарши ўйинда йигитлар ўз сўзини айтишди ва уч очкога эга чиқдик.

- Ўйинни Самарқандда эмас, Жиззахда ўтказяпсизлар. Бу жамоага қайсидир томонлама таъсир қиляптими?

- Ҳамма ўз шаҳарида, мухлислари қаршисида ўйнаса албатта яхши. Вазиятдан келиб чиқиб ҳозир бошқа жойда ўйнаб турибмиз. Майдонимиз янгиланяпти. Қачонки, ҳаммаси тугаса Самарқандга қайтамиз. Унгача бошқа майдонда ўйнашга мажбурмиз.

- Ҳозирча чемпионатимизда сизга қайси жамоа кўрсатаётган ўйин ёқяпти?

- Қайсидир жамоани ўйини ёқяпти ёки ёқмаяпти дея олмайман. Нега деганда, тўғриси, мен бошқа клубларни таҳлил қилмайман. Хаёлим фақат ўзимни жамоам билан боғлиқ. Шу боис бошқаларни жиддий кузатмайман.

Шуҳратбек Жўраев.