"Сантос" Неймарни машғулотни ўтказиб юборгани учун жазоламади

«Сантос» раҳбарияти юлдуз ҳужумчи Неймарни жамоа машғулотини қолдиргани учун жазоламади. Бу воқеа футболчининг ёш жамоадошлари билан тортишувидан кейин содир бўлган эди.

Globo нашри хабар беришича, бразилиялик клуб 34 ёшли форвардга нисбатан интизомий чора кўришдан воз кечган. Неймар клуб рухсатисиз машғулотда иштирок этмаганига қарамай, масала ички тарзда ҳал этилган.

Манбаларга кўра, можарони юмшатишда Неймарнинг отаси муҳим роль ўйнаган. У клуб базасига келиб, «Сантос» раҳбарияти билан суҳбат ўтказган. Шунинг ортидан вазият барқарорлашган ва томонлар келишувга эришган.

Ҳозирда Неймар жамоа билан тўлиқ ҳажмда шуғулланмоқда ва яқинлашиб келаётган ўйинларга тайёргарлик кўрмоқда.

Эслатиб ўтамиз, Неймар «Сантос» сафида 2025 йилда яна майдонга қайтган эди. Форварднинг амалдаги шартномаси жорий йил охиригача мўлжалланган.