Сардор Рашидовни Криштиану Роналду билан нима боғлаб туради?

Ўзбекистон миллий терма жамоаси ҳужумчиси Сардор Рашидов 2019 йили Португалия чемпионатида “Насьонал” клуби шарафини ҳимоя қилган эди. Истеъдодли ҳужумчимиз бу жамоа таркибида еттита учрашувда қатнашиб, рақиблар дарвозасини уч маротаба аниқ нишонга олган.

Сардор Рашидовни Португалияга таклиф қилган “Насьонал” клуби жаҳон футболига Криштиану Роналдудек футболчини кашф этиб берганини кўпчилик билмаса керак. Чунки аксарият мухлислар супер ҳужумчини “Спортинг” тарбиялаган, деган фикрда юради.

Хусусан, “Спортинг” клуби ҳам яқинда ўз академиясига Криштиану Роналду номини бергани айнан шу тушунча билан боғлиқ, десак муболаға бўлмайди.  

- Бундан буён “Спортинг” академияси Португалиянинг барча замонлардаги энг зўр ўйинчиси, дунёнинг энг яхши футболчиси ва беш карра олтин тўп соҳиби Криштиану Роналду номи билан аталади.

Криштиану жамоамизга 1997 йили 12 ёшида келиб қўшилган. 2002 йилнинг 14 август куни 17 ёшида катталар ўртасида дебютини нишонлади. Бу тарихий воқеа Миланда “Интер”га қарши ўтказилган учрашувда рўй берди. Клуб ўзининг буюк футболчи номини абадийлаштириш орқали ёш истеъдод эгаларига ўзгача иштиёқ ва илҳом тақдим этади.

Қулай фурсат бўлиши билан биз янги номланган академиянинг расмий очилиш маросимини ташкил этамиз. Криштиану Роналду академияси “Спортинг”ни бутун дунёга танитади, - дейилади клубнинг расмий  баёнотида.

“Спортинг”нинг бу баёноти “Насьонал”нинг кескин эътирозига сабаб бўлди. Бу клуб раҳбарияти “Спортинг” президенти Фредерико Варандасга мактаб йўллаб, академияга Роналдунинг номи берилишига қаршилиги ва норозилигини расман билдирди.

“Насьонал” раҳбарлари ўз норозилигини ушбу клуб академияси 13 йилдан буён Криштиану Роналду номи билан аталаши ва яна шу номдаги бошқа академиянинг пайдо бўлиши турли тушунмовчиликлар келтириб чиқариши билан изоҳламоқда. Қолаверса, товарлар ва хизматларни рўйхатдан ўтказишда ҳам уларнинг номи бир хил ва жуда ўхшаш бўлишига йўл қўйилмайди.

“Насьонал” ҳам, “Спортинг” ҳам ўз академияси мавқеини кўтариш, омма эътиборини қозониш ва кенгроқ танилиш учун жаҳон футболининг ҳақиқий юлдузи ҳисобланган Криштиану Роналдунинг номидан ва мавқеидан фойдаланишга ҳаракат қилаётганини тушунса бўлади. Чунки ҳар икки клуб ҳам футболчини тарбиялашда муайян ҳиссасини қўшган.

Маълумки, Криштиану “Насьонал” клуби жойлашган Мадейра оролининг Фуншал шаҳрида вояга етган. Роналду олти ёшлигида отаси фаолият юритадиган “Андоринья” академиясига қатнай бошлайди. Қисқа муддат ичида Роналду Мадейранинг икки буюк клуби – “Насьонал” ва “Маритиму” эътиборига тушади. Роналдунинг отаси ўғлининг “Маритиму”да ўйнашини истаса, чўқинтирган отаси уни ўзи ишлайдиган “Насьонал”га чорлайди.

Улар Криштианунинг қайси жамоага ўтишини ҳар икки клуб вакилларининг “Андоринья” клуби президенти билан учрашувда ҳал қилишга келишиб оладилар. Бироқ, белгиланган учрашувга “Маритиму” вакили келмагач, Роналду “Насьонал”га йўл олади. Бу ўзига хос трансфер учун “Насьонал” клуби “Андоринья”га ўсмир футболчилар учун икки комплект форма ва 20 та футбол тўпини беради.

1995-1997 йилларда “Насонал”да шуғулланган Роналдуни чўқинтирган отаси “Спортинг” раҳбарияти билан келишиб, академияга жойлайди. У ёғига эса, моҳир ҳужумчи қандай улкан ютуқларга эришгани ҳаммамизга аён.

Ҳамюртимиз Сардор Рашидов эса, Криштиану Роналдудек футбол юлдузи тарбиялаган жамоа – “Насьонал” шарафини ҳимоя қилганини бир умр унутмаса керак.