![](https://static.sports.uz/crop/052663401273d995a4528e9d808cb121.jpg)
Сардор Рашидовни "Навбаҳор"га ким таклиф қилди? Унинг Лушан билан муносабати қандай? Футболчи интервьюда ҳаммасига ойдинлик киритди
Яқинда “Навбаҳор” клуби Сардор Рашидовнинг трансферини эълон қилди. Бу Суперлигамизда ёзги селекция чоғидаги энг топ трансферларидан бирига айланди, десак муболаға қилмаган бўламиз.
Тажрибали ярим ҳимоячи бунгача БАА чемпионатида фаолият олиб бораётганди. Маълум танаффусдан сўнг Рашидов яна чемпионатимизга қайтди. Албатта, унинг қайтиши “Навбаҳор” орқали юз бергани янада қизиқарлидир.
Sports.uz журналисти Рашидов билан боғланди ва айрим саволларга жавоб олди.
- Сардорбек “Навбаҳор” клубига ўтиш орқали кўпчиликни ёқимли маънода ажаблантирдингиз. Сиз учун ҳам бу таклиф кутилмаганда бўлдими? Қандай қабул қилдингиз? “Навбаҳор”дан айнан ким таклиф билан чиқди?
- Ҳа, мени “Навбаҳор”га келишим бир томондан янги чақирув бўлди. Биласиз, бу клуб ҳар доим ўз олдига юқори мақсадларни қўйган ва менга бу қизиқ туюлди. Менга клуб президенти Отабек ака Саматов ва бош мураббий Сергей Лушан қўнғироқ қилишди. Айтишим керакки, менга бу таклиф жуда маъқул келди. Гапнинг дангали мени “Навбаҳор” мухлисларига қарзим бор эди (кулади).
- Маълумки, яқинда Сергей Лушан бош мураббий этиб тайинланди. У билан “Бунёдкор”да ишлагансиз. Аммо ўзаро муносабатларингизга бироз совуқчилик тушганди. Энди ҳаммаси ортда қолдими? У билан илк кўришганингизда нималарни айтди?
- Йўқ, бу нарса ўша пайтда ёпилган. Мен ўша пайтлари Лушанга қўнғироқ қилганман ва ундан узр сўраганман. Бу ҳақида муаммо йўқ.
- Ортга қайтишингизга сизга яна нима туртки берди?
- Албатта, “Навбаҳор” мухлислари ва жамоанинг мақсади менга маъқул. Шу нарсалар туртки бўлди.
- “Навбаҳор”да қайси рақамни танладингиз?
- Худо хоҳласа, 11-рақамда ўйнайман.
- “Дубай сити” клубидаги фаолиятингиз ўзингиз истагандек кечдими?
- Ҳа, албатта. “Дубай”да анча ўйин ўтказдим ва голлар урдим. Ўзимга ишончим янада ошди.
Шуҳратбек Жўраев.
Фикрлар