Савиям ПСЖга тўғри келмай қолди

“Эльче” жамоасининг янги ўйинчиси – аргентиналик машҳур футболчи Хавьер Пасторе бундан бир неча йил олдин ПСЖдан нега кетганини айтиб берди.

- Ўшанда ПСЖ мен билан хайрлашишни истамаганди. Менга беш йиллик шартнома таклиф қилишган. Лекин мен рад жавобини бердим. Чунки савиям клуб даражасига тўғри келмай қолганди.

Клуб раҳбариятидан мени қўйиб юборишларини сўрадим. Чунки бизга қўйилаётган талаблар юқори эди ва менга оғирлик қиларди. Улар мени тўғри тушунишди, - деди Хавьер Пасторе.

33 ёшли футболчи 2011-2018 йиллар давомида ПСЖ шарафини ҳимоя қилганидан кейин “Рома”га ўтган эди. Жозе Моуриньо Римга келгач, Пасторе бу жамоани ҳам тарк этди ва футболдан ташқарида юрди.

2023 йилнинг 6 январидан Пасторени “Эльче” ўз сафига қўшиб олди.