Сен кўнсанг, Бернарду Силва бизда ўйнайди

“Манчестер Сити” билан шартномаси якунланаётган 31 ёшли ярим ҳимоячи Бернарду Силва келаси мавсумдан бошлаб, “Барселона” шарафини ҳимоя қилишга розилик берди.

Бу ҳақда AS нашри хабар тарқатди.

Трансфер якунланиш арафасида, аммо ҳали тўлиқ расмийлаштирилмаган. Клуб футболчи билан келишувга эришиб бўлган.

Спорт директори Деку ва клуб президенти Жоан Лапорта Силвани жамоада кўришни истамоқда, футболчининг ўзи эса бошқа Европа клубларининг қизиқишига қарамай, каталонияликлар таклифини танлади.

Бернарду Силвага “Атлетико Мадрид”, “Бенфика”, шунингдек Туркия, Франция, Италия ва Саудия Арабистони клублари чорлов юборган эди.

Бироқ битим ҳали “Барселона” бош мураббийи Ханс-Дитер Фликнинг тасдиғини олиши керак. Трансфер фақат унинг розилиги билан амалга оширилади.

30 июнь куни Бернардунинг “Манчестер Сити” билан шартномаси якунланади. У 2017 йилдан буён “шаҳарликлар” сафида ўйнаб келмоқда.

Жорий мавсумда португалиялик футболчи барча турнирларда 53 та ўйинда қатнашиб, 3 та гол ва 5 та голли узатма муаллифи бўлди.