Сергей Кучеренко:

Охирги пайтларда яна “Насаф” атрофида юз бераётган воқеалар кўпчиликнинг эътиборини тортяпти. Айниқса, молиявий муаммо туфайли клубда жиддий инқироз юзага келаётгани хавотирли, албатта.

“Насаф” бош директори Сергей Кучеренко клуб матбуот хизматига жамоага оид воқеаларга ўз муносабатини билдирди.

- Авваламбор, Рўзиқул Бердиев бошчилигидаги мураббийлар штабига, футболчиларимизга ҳозирги қийин вазиятга қарамасдан, ўз фаолиятларини олиб бораётганлари учун миннатдорлигимни билдираман ва уларнинг меҳнатларини қадрлайман. Ҳозирги кунда пандемия туфайли нафақат бизда, балки бутун дунёда ҳам қийин вазият. Шундай мураккаб ҳолатда ҳам бизга ишонган, қўллаб-қувватлаб турган жамоамизнинг содиқ мухлисларига ҳам алоҳида ташаккур, деб қоламан.

Қанчалик қийин бўлмасин, ҳозирги кунда ҳам клубимиз ўз фалсафаси асосида фаолиятини давом эттирмоқда. Шу кеча кундузда миллий ҳамда ёшлар терма жамоасига тўққиз нафарга яқин футболчиларимиз жалб қилинди. Бундан ташқари, “Насаф” футбол клубининг ўттизга яқин тарбияланувчилари турли ёш тоифасидаги терма жамоаларга номзод ҳисобланади. Бу футболчилар нафақат “Насаф” жамоасини, балки Ўзбекистоннинг шаънини халқаро майдонларда ҳимоя қилишади. Агар клубимизга бўлган эътибор сусаймаса жамоамиз терма жамоаларга футболчиларни етказиб беришни кўпайтирса кўпайтирадики, асло тўхтатмайди.

Ҳомийлардан, спорт, хусусан футболимиз мутасаддиларидан Республикада ҳар томонлама ўз ўрнига эга бўлган жамоамиз тақдирига бефарқ бўлмасликларини сўраб қоламан. “Насаф”дек ўз тарихи ва фалсафасига эга бўлган клубнинг инқирози ўзбек футболи учун жуда қимматга тушиши мумкин, - дейди Сергей Кучеренко.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар