"Шармандалик..." ёхуд Бахтиёр Ашурматов қачон истеъфога чиқиши мумкинлигини айтди

“Қўқон-1912” жамоаси негадир ўзига кела олмаяпти. Мағлубиятлар давом этяпти. Бу сафар “Қизилқум”ни қабул қилди ва 1:3 ҳисобида енгилди. Ўйиндан кейин қўқонликлар устози Бахтиёр Ашурматов мағлубиятни қуйидагича изоҳлади:

- Бугунги ўйинга танлаган тактика ва таркибимиз ўзини оқламади. Бу ҳолатда тўлиқ айб мураббийлар штаби ва менда. Уйда ўйнаб турганимизни инобатга олиб, иккита ҳужумчи билан майдонга чиқдик. Лекин бу ўзини оқламади. “Қизилқум” кучлироқ кўринди. Тўпни назорат қилишда ҳам, вазиятларни яратишда ҳам. Шу сабабли улар ҳаққоний ғалабага эришди. Биз 0:2 ҳисобидан кейингина тезроқ ҳаракатланишни бошладик. Жамоамизни ҳар қандай ҳолатда ҳам қўллаб-қувватлаб турган мухлисларимизни тўғри тушуниб турибман. Уларнинг ишончни оқламаяпмиз. Ушбу учрашув мураббийлик ишини шунчалик мураккаблигини кўрсатиб бердики, яқинда олқишлаб турган мухлислар энди норози бўлишяпти. Бунга ўзимиз айбдормиз. Агар мени кетишим Қўқон футболига фойда бўлганида шундай қарорга келардим. Қизиққонлик билан қарор қабул қилиб бўлмайди. Биз ҳозирги вазиятни тўғрилашимиз керак. Айрим чизиқларда бизда рақобат йўқ ҳисоби. Айрим сабабларга кўра мавсумга шундай таркиб билан кириб келдик. Тўғри, таркибимизда яхши савиядаги футболчилар бор. Мурод Холмуҳаммедов, Қувондиқ Рўзиев, Жавоҳир Сидиқов каби. Иван Йосович ҳар қандай ҳолатда ҳам охиригача курашяпти. Лекин биз кўплаб очколарни йўқотдик. Шу боис жамоамизга ҳозирги танаффус жуда муҳим эди. Биринчи даврадан кейин албатта ўзгариш бўлиши керак. Агар ўзгариш бўлмаса ёзги танаффусда жамоа раҳбарияти билан қандай қилсак жамоа учун яхши бўлиши ҳақида гаплашиб оламиз. Ҳозир мухлисларимизни ҳар қандай ҳолатда ҳам биздан жахллари чиққани бор гап. Ўтган турдаги ва бу сафарги уятли ўйинимиз учун узр сўрайман. Ўйлайманки, қўллаб-қувватлаб туришса бу вазиятдан чиқа оламиз.

- Голдан кейин жамоа ҳаракатни оширди. Агар бошидан шундай ўйнаганида йирик ҳисобда ютқазмасди. Ҳакамлар ҳақида нима дейсиз?

- Мағлубиятга учрагандан кейин ҳакамни айблаш нотўғри бўлади. Танлаган тактикамиз, ўйнаган ўйинимиз, бугунги ўйинга олиб борган ишимиз шармандалик. Лекин охирги пайтларда ҳакамлик ривожланяпти деб ўзимизни-ўзимиз алдаб юрибмиз. Қайсидир мутахассис ҳакамлар ҳақида гапирса баҳоналар қиляпти ёки жарималар қўлланиляпти. Бунга хорижлик мутахассислар ҳам эътироз билдиришяпти. Биз эса гапирмайлик, тинчгина юраверайлик деб қўя қоламиз. Бу эса ўзбек футболининг муаммосини кўпайтиряпти. Ҳозир ҳакам десам бу мен учун уят. Шармандачилик десам ҳам бўлади. Йигитларни айбламоқчи эмасман. Футболчиларни биз тайёрладик, демак мен айбдорман. Аммо ҳакамлик ривожланяпти деб ўзимизни-ўзимиз алдашни йиғиштиришимиз керак. “Сурхон” билан учрашувда ҳакам 70 метр узоқликдан туриб пенальтини йўқ қиляпти. Ҳозир эса жарима майдони ичида яқин бўлган вазиятда...Ҳакамлар тўғрисида қизишиб гапириб юборган бўлишим мумкин. Ҳакамлардан ҳам кўра барибир ўзимиз айбдормиз. Шу сабабли айбни ўзимиздан қидиришимиз керак. Бугунги ўйин учун мухлисларимиз олдида жуда ҳижолатдаман. Биринчи марта айрим ишқибозларимиз истеъфони талаб қилиб бақиришди. Улардан хафа эмасман. Тушуниб турибман, чиройли футбол ва ғалаба керак. Ҳеч қайси мухлисимизни селекция қандай бўлган, жамоани ҳолати қандай, нечта футболчи тарк этди, тайёргарлик кўриш учун клуб қанақа вазиятда эди, бу каби ҳолатларга ҳеч ким эътибор қилмайди. Бу касбни танладингми, натижа кўрсатиш ва мухлислар ишончини қозониш керак. Футбол мухлислар учун. Улар ўз оилаларининг ризқини кесиб чипта олиб ўйинга келишади. Йўл-кира қилиб йўл босишади.

Ўтказиб юборган голлардан кейин ҳаракат қилдик. Шунда ҳам мухлисларимиз жонланиб бизни қўллашди. Жанговар ўйинни бошидан кўрсатганимизда улар биздан хафа бўлишмасди. Менга алам қилиб тургани бу жамоамизда жанговарликнинг йўқолганидир. Ҳар доим меҳнат қилиш керак ва охиригача курашиш лозим. Биз эса фақат 0:3 ҳисобидан кейин озгина жонландик. Ҳар қандай ҳолатда ҳам ишқибозларимизга раҳмат. Танқидларини тўғри қабул қиламиз. Олдин ишлаган клубларимда мендан норози бўлишса, жойимга ёпишиб олиб қолган эмасман, кўпинча кетганман. Аммо мен қўқонликман. Бу вазиятда ташлаб кетмасдан айбни ўзимиздан излаб, вазиятни тўғрилашимиз керак. Кетиш ҳақида кейин ўйлаш мумкин бўлади. Гарчи ишқибозлар истеъфони хоҳлашган бўлса-да, ҳозир кетиб қолсам нотўғри бўлади. Нима бўлганда ҳам вазиятни тўғрилашимиз керак.