Шавкат Саидов: "Металлург" билан янги чўққиларни забт эта оламиз"

Ортда қолаётган “Металлург” футбол клуби учун ҳам ўзига яраша эсда қоларли воқеаларга бой бўлди. Жамоа ҳар томонлама ривожланиш учун олдинга яхшигина қадам ташлади. Клубнинг асосий таркибидан то барча ёш тоифаларидаги жамоаларигача мавқеини мустаҳкамлаш ва ривожланиш кузатилганини айтиш даркор.

“Металлург” ПФК бош директори Шавкат Неъматжонович Саидов эса кириб келаётган Янги – 2024 йил арафасида ўзларининг дил сўзлари билан ўртоқлашди.

-  Яна саноқли соатлардан сўнг 2023 йилни кузатамиз. Ўтаётган йилимиз футбол клубимиз учун анча омадли бўлди, дейишимиз мумкин. Ташкил этилганига энди икки йил бўлган “Металлург” футбол академиямиз ўз маҳсулини бера бошлаганлиги раҳбариятимиз қаторида футбол ишқибозларимизни ҳам хурсанд этди. Биринчи қалдирғочларимиз – 2004 йилда туғилган йигитлар, академиямизнинг биринчи битирувчилари бу мавсум Ўзбекистон U19 чемпионатида шоҳсупанинг юқори поғонасига кўтарилиб, қалбларимизни қувонч, фахр ва ифтихор туйғуларига буркади. Бекобод шаҳримизга чемпионлик шукуҳини қайтарди.

U13 ва U16 жамоаларимизнинг ЎФА Кубоги мусобақасидаги қатнашуви ҳам клубимиз ривожланишнинг тўғри йўлидан бораётганлигини кўрсатди. Акмал Холматов шогирдлари - U13 жамоамиз чемпионлик йўлида фақатгина пенальтилар сериясида “Пахтакор” академиясига имкониятни бой бериб қўйган бўлса, Мурод Тўйчиев бошчилигидаги 2007 йилда туғилган ўсмирларимизга ярим финалда омад кулиб боқмади. Қолган ёш тоифамиздаги жамоаларимизнинг ҳам Тошкент шаҳар очиқ биринчилиги – Премьер лигадига қатнашувидан кўнглимиз тўлди.

Энг кичик ва энг ёши катта гуруҳларимизни одатдагидек бу йил ҳам Испания сафарига олиб бориб келдик. “Реал” (Мадрид) футбол академияси билан танишув, тажриба алмашишдан ташқари Сан Себастьян шаҳрида ташкиллаштирилган йирик халқаро турнирда иштирок этдик. Ҳар иккала ёш тоифамиз беш қитъа футбол академиялари жамоаларини бирлаштирган фестивалда гуруҳ баҳсларидан муваффақиятли ўтишди ва плей-оффга чиқишди. U17 жамоамиз чорак финалгача етиб бориб, кучли саккизликка киришди.

Аввало, клуб академияси тарбияланувчиларининг шундай ютуқларга эришиши таъсисчиларимиз – Ўзбекистон металлургия комбинати раҳбариятининг бизга кўрсатаётган ғамхўрлиги ва эътибори натижаси деб биламан. Қолаверса, испаниялик мутахассисларимиздан тортиб барча мураббийлар штабимиз, мутахассисларимизнинг бир ёқадан бош чиқариб, битта мақсад йўлида жипс ҳаракатларининг самарасидир.

Умид қиламанки, келаётган йилда ҳам “Металлург” футбол клубимиз билан биз янги янги чўққиларни забт эта оламиз. Асосий таркиб – бош жамоамиз, уларнинг энг яқин ўринбосарлари олдига жиддий вазифаларни қўйганмиз. Қолаверса, “Эл Голасо” футбол академиямиз тарбияланувчилари янги мавсумда ҳам янги муваффақиятлари билан бизни хурсанд этишига ишонаман. Кириб келаётган йил “Металлург” футбол клуби учун муваффақиятлар йили бўлишини истаб қоламан.

2024 йил Ўзбек футболи учун масъулиятли йил саналади. Яна бир неча кунлардан сўнг Сречко Катанец бошчилигидаги Миллий терма жамоамиз Осиё кубогидаги иштирокини бошлайди. Тимур Кападзе етакчилигидаги Ўзбекистон олимпия терма жамоамизни Осиё чемпионати орқали Париж Олимпиадаси саралаш баҳслари кутиб турибди. Шу ва бошқа терма жамоаларимиз 2024 йилда халқаро майдонларда чиройли, ҳужумкор футбол намойиш қилиб, олдиларига қўйилган мақсадларга эришиб, футболсевар ватандошларимизни – барчамизни хурсанд этсин!