Шахзод Азмиддинов "Ал-Аҳли"га қарши ўйин олдидан: "Биз ҳам совға эмасмиз"

Маълумки, “Андижон” клубини Осиё Чемпионлар лигаси 2 мусобақасининг гуруҳ босқичидаги сўнгги тур доирасида Қатарда “Ал-Аҳли”га қарши жуда муҳим ўйин кутмоқда.

Айни пайтда “Бургутлар” Дохада бўлажак учрашув учун тайёргарлик кўришмоқда.

Жамоанинг тажрибали футболчиларидан бири Шахзод Азмиддинов эса “Ал-Аҳли”га қарши баҳс олдидан клуб матбуот хизматига интервью берди.

- “Андижон”ни Қатарда “Ал-Аҳли”га қарши жуда муҳим ўйин кутяпти. Бўлажак баҳсга тайёргарлик қандай олиб борилмоқда?

- Тайёргарлигимиз зўр бўляпти. Олдимизда қанақа ўйин турганлигини ҳамма билиб турибди. Худо хоҳласа, қўлдан келганича ютишга ва гуруҳдан чиқишга ҳаракат қиламиз.

- Фаолиятингиз давомида Қатар клубларига қарши ўйнагансиз. Қандай хотиралар қолган ва энг қийини қайси учрашув бўлган?

- “Ал-Садд” билан ўйнаганмиз. “Ал-Васл”га қарши ҳам ўйнаганмиз, аммо унда мен захирада бўлганман. “Ал-Васл”га ютқазганмиз. “Ал-Садд”ни эса ЖАР стадионида мағлуб этганмиз. Ушбу учрашув қизиқарлироқ бўлган. Мен майдонга тушганман. “Ал-Васл”га қарши беллашувда эса бошқа таркиб бўлган.

- Умуман, Қатар жамоаларига қарши ўйнаш сиз учун қандай аҳамиятга эга?

- Барибир улар кучли. Маҳоратли легионерлари бор. Шуни ҳисобга олган тақдирда учрашув қийин бўлади. Бироқ ғалаба қозонишга ҳаракат қиламиз. Биз ҳам совға эмасмиз.

- “Ал-Аҳли”га қарши Андижондаги ўйинда ҳисоб очилмаганди. Ўша баҳсдан сизда қандай таассурот қолган?

- Уларда кучли легионерлари бор. Шуларни “ёпсак” уч очко олса бўлади.

- “Андижон” учун бу охирги имконият. 5 та дурангдан кейин энди фақат ғалаба қониқтиради...

- Ҳамма футболчилар профессионал. Қанақа босқичда турганимизни улар билиб туришибди. Ютсак албатта чиқамиз. Бошқа натижа бизни қониқтирмайди, фақат ғалаба қозонишимиз лозим.