Шерзоджон Комилов: "Мавсумни чемпион сифатида якунламоқчимиз"

"Локомотив" ярим ҳимоячиси Шерзоджон Комилов биринчи давра ҳақида қисқача тўхталиб ўтди.

"Биринчи давра яхши ўтди. Асосийси - бирор марта мағлуб бўлмаганимиз ва барча баҳсларда очко олганимиз. Бизнинг олдимизга аниқ мақсад ва вазифа белгилаб берилган. Бу йўлда барчамиз бир ёқадан бош чиқариб меҳнат қиляпмиз.

- Иккинчи даврадан нималар кутяпсиз?
- Бошқа жамоалар ҳам борини бериб курашиши аниқ. Аммо биз мавсумни чемпион сифатида якунламоқчимиз. Ўйинлар сони кўп эмас, шу сабабли барча учрашувларда юқори куч билан ўйнай оламиз ва уларда фақатгина ғалаба учун майдонга тушамиз.

- Биринчи даврадаги энг яхши ўйинингиз?
- Самарқандда "Юниред"га қарши ўйин. Ўйиннинг биринчи таймида битта гол урдик, аммо рақиб пости томон жуда кўп зарбалар бердик. Иккинчи бўлимда эса асосий мақсадимизга эришдик. Ўшанда нафақат мен, балки, бутун жамоа ўзини яхши кўрсата олганди", - деди Комилов.