SHOMOU - Италия матбуоти ўзбек йигити ҳақида бонг урмоқда! 14-рақамга қайтган Элдор ва "Рома" бош директори трансфер ҳақида нима деганини биласизми?

Сиз қачондир дунёнинг топ-мураббийларидан бири – Жозе Моуриньонинг қўли остида ўзбекистонлик футболчи тўп суришини тасаввур қилганмисиз? Бу ҳаётда излаган имкон топиши, қилган меҳнатига яраша мукофот олишини эшитганмиз. Бунга Элдор Шомуродовни яққол намуна қилиб кўрсатса арзийди. Шомуродов “бошқача мураббий”ни ўзига ром этганини эшитиш шунчалик ёқимлики, бу худди тушга ўхшайди.

Охирги пайтлада нафақат ўзимизда, балки хорижий ОАВда “Рома” ва Шомуродов мавзуси асосий ўринга чиқди. Айниқса, Россия ва Италияда бу ҳақида тинмасдан маълумотлар бериб бориляпти. Кузатиб бораётган бўлсангиз, Sports.uz сайти орқали ҳам Шомуродов ҳақида турли хабар ва мақолалар ҳукмингизга ҳавола қилиняпти.

Ҳар куни, ҳар соатда турли янгиликлар чиқди. Ниҳоят, “Рома” клуби Шомуродовни расман таништирди. Унгача эса бу борада томонлар эълон қилишга шошилмадилар. Ростини айтганда, Sports.uz мухбири сифатида Шомуродовга кунора қўнғироқ қиляпмиз. Чунки ҳозирги вазиятнинг асл моҳиятини унинг ўзидан эшитиш барибир бошқача. Лекин ҳозирча ҳамюртимиз бизнинг қўнғироқларимизга жавоб бергани йўқ. Бу борада уни тўғри тушунамиз. Чунки ҳар қандай янги ўйинчи шартнома имзолаганида аввало клуб расмий сайти учун дастлабки фикрларини билдиради. Шомуродов ҳам одатга кўра шундай қилди ва жумладан қуйидагиларни айтди:

“Менинг фаолиятимда “Рома” клубига кўчиб ўтишим олдинга ташланган катта қадам, деб ҳисоблайман. Бу жамоада ўзимни кўрсатиш учун бор имкониятимни ишга соламан. “Рома” – бу жаҳонда ўз ўрнига эга бўлган катта клуб! Бундай жамоада тўп суришни хоҳлаганим учун ҳам келишув жуда тез рўй берди. Мен “Рома”нинг аъзосига айланган эканман, энди менга билдирилган ишончни оқлашга ҳаракат қиламан. Умид қиламанки, мураббий ва янги жамоадошларим билан тез тил топишиб кетаман”, - дея дастлабки фикрлари билан ўртоқлашди Элдор.

Ўз навбатида, “Рома” клуби бош директори Тьягу Пинто Шомуродов борасида қуйидагиларни маълум қилди: “Элдор – ривожланиш учун катта салоҳиятга эга бўлган ҳужумчи ва ўзи яхши биладиган лигада ўзини “Рома” сафида кўрсатишга интилади. Бу истак билан бир қаторда унинг ўйинчи сифатлари ҳам мураббийимиз хоҳлаган услубга мос келади. Шунинг учун бизнинг клубга хуш келибсиз!”.

Шомуродов “Женоа”да 61-рақамда тўп сурган бўлса, “Рома”да ўзи учун қадрдон бўлган 14-рақамни танлади. Чунки у “Ростов”да ҳам ушбу рақамда тўп сурганини яхши биласиз.  

Италия футболида ўз сўзини айтишни бошлаган ўзбекистонлик йигитнинг “Рома”га ўтиши у ердаги ОАВ вакилларининг ҳам диққат-марказида бўлиб турибди.

Жумладан, Римда нашр этиладиган “Il Romanista” фаол тарзда Шомуродовнинг ҳар бир қадамини синчковлик билан кузатяпти ва шунга яраша ёритиб боряпти. Мазкур нашрни кузатар эканмиз, куни кеча италиялик журналистлар “Il Romanista”нинг асосий муқовасига Шомуродовнинг Моуриньо билан бирга тушган суратини жойлади. Ҳамкасбларимиз сарлавҳа қўйишда ҳам анча қизиқ вариантни танлаганлар. Улар Шомуродов ва Моуриньо сўзидан дастлабки ҳарфларини ишлатган ҳолда “SHOMOU” дея ном берган. Бу шунчаки ажойиб!

Romanista сўзи ўзбекчада римликлар маъносини билдиради. Шу сабабли “Il Romanista” нашри  “Рома” клуби ва у ҳақдаги янгиликларни кўпроқ ёритади. Унинг саҳифаларида чиндан ҳам Шомуродовнинг Моуриньо жамоасига ўтгани ҳақида турли хабарлар бериляпти. Шу билан бирга Элдор ҳақида алоҳида мақола ҳам чоп этилган. Юқорида айтиб ўтганимиздек, унинг Москвада Моуриньо билан бирга тушган сурати италияликларни ўзига жалб қилди. Натижада улар Жозенинг Элдорни ўз жамоасида кўришни хоҳлагани бежиз эмаслигини тушуниб етмоқдалар. 

Ўша “Il Romanista” куни кеча Шомуродов ҳақида яхши мақола чоп этди. Унинг сарлавҳаси қуйидагича: “Хоккей, Осиё Кубоги ва “Рома” ёхуд Шомуродов яна Моуриньони қидириб топди”. Унда Элдорнинг футболга кириб келиши, олдинги фаолияти, Жозе билан қандай танишгани ва яна бошқа мавзуларни ўз ичига олади. Ушбу мақолада ёзилган айрим қизиқарли жиҳатларни сиз билан баҳам кўришамиз.

“Моуриньо Шомуродов билан Москвада учрашган кунда у хоккей ўйинига ташриф буюрганди. Бу 2019 йилнинг 3 февраль куни эди. Футболчининг ўзи эса Осиё Кубогидаги саргузаштларини якунлаб Москвага эндигина қайтганди. Ўша Осиё Кубогида Шомуродов тўртта гол уриб тўпурарлар рўйхатидан жой олганди. Москвадаги ресторанда уларнинг учрашувида Жозе Моуриньо ҳамюртимизнинг Осиё Кубогида ўзини кўрсатгани ва тўртта гол урганидан хабари борлигини айтади. Чунки ўша пайтда beiNSPORTSда эксперт сифатида Осиё Кубогини кўрганди. Ўша маҳалда у Шомуродовнинг ўйинларини ҳам диққат билан  кузатган.

“МАТЧ ТВ” эфири чоғида Элдор шундай деди: “Моуриньога Осиё Кубогида иштирок этиб, бир нечта гол урганимни таъкидлаганимда, у менга бундан хабардор эканлигини айтди. Аввалига бунга ишонмадим. Кейин эса биз яқиндан танишдик ва у билан яхши тил топишиб кетдик”.

Моуриньо Шомуродов учун тасодифан учратиб қолинган ажойиб шахс эди. Балки унинг учун севимли мураббийи ҳисобланади. У болалигида Самарқанддан 300 километр узоқликда жойлашган Жарқўрғонда энди-энди тўп тепишни бошлаган вақтларида Моуриньони ёқтиргани унинг “Челси”га мухлислик қилишига сабаб бўлган.

Шомуродов аъло даражадаги ва унутилмас дебют мавсумидан кейин “Женоа” мухлислари юрагидан ўрин олган. Айнан унинг Римга кўчиб ўтиши юзасидан музокаралар бошлангани ҳақидаги янгиликлар “Женоа” мухлисларига ёқмади. Чунки бунгача ҳам ижара муддати якунига етган Заппакоста, Стротман сингари муҳим ўйинчиларнинг йўқотилганидан кейин генуяликлар Шомуродов тимсолида жамоанинг янги етакчисини кўраётгандилар. Клуб Элдор билан рақобатбардош ва кучлироқ жамоани шакллантиришни режалаштиргандилар. Унинг сотиб юборилиши шундоқ ҳам “Женоа” президенти ва клуб ишқибозлари ўртасидаги яхши бўлмаган муносабатларни янада таранглаштириб юборди”.