Шомуродов жамоаси Конференциялар лигасидаги ғалаба учун қанча пул олади?

Конференциялар лигасидаги ғалаба “Рома”га катта молиявий фойда келтиради, деб ёзмоқда Италия матбуоти.

Манбаларнинг маълум қилишича, ҳисоб-китобларга кўра, УЕФА таснифидаги учинчи мусобақа финалидаги ғалабадан сўнг, римликларнинг ушбу турнирдан олган жами фойдаси 19,63 миллион еврони ташкил қилди.

Турнирнинг гуруҳ босқичидаги натижалар орқали “Рома” футболчилари клуб бюджетига 5,75 миллион евро даромад келтирди.

Жозе Моуриньо шогирдлари плей-офф босқичида ҳам барча тўсиқлардан муваффақиятли ўтгани учун ташкилотчилар томонидан ажратилган 8,9 миллион еврони қабул қилиб олади.

УЕФА клублар рейтингидаги ўсиш учун “Рома” Конференциялар лигасининг барча иштирокчилари учун мўлжалланган 23,5 миллион евродан энг катта қисмини, яъни 1,34 миллион еврони ўзиники қилиб олди.

Шунингдек, “Рома”га халқаро турнир телетрансляцияси ҳуқуқини сотиш орқали олинган маблағдан 4,36 миллион евро ажратилди. “Рома” бу мусобақада Италиянинг ягона вакили бўлгани сабабли бу мамлакат учун ажратилган юқоридаги сумманинг 100 фоизини ўзи оладиган бўлди.

Моуриньо “қария” футболчини сўраяпти

Жозе Моуриньо келаси мавсум ўз жамоасида кўрмоқчи бўлаётган ўйинчилар орасида Англия премьер-лигасида маҳорат кўрсатган футболчилар кўпчиликни ташкил қилади.

Хусусан, бош мураббий кўрсатмасига кўра, римликлар спорт директори Тьягу Пинто Англия премьер-лигаси вакили “Вулверхэмтон”нинг икки португалиялик ўйинчиси трансфери бўйича иш олиб бормоқда.

Биринчи ўринда, Моуриньо Рубен Невешнинг Римга келишини истаяпти. Лекин 25 ёшли ярим ҳимоячининг трансфери жуда мураккаб ҳисобланади. Чунки бу ўйинчининг амалдаги шартномаси якунланишига ҳали икки йил бор. Бундан ташқари, Европанинг бир қатор катта клублари Невешни ўз сафига чорлаяпти.

Нишондаги иккинчи фигура – Жоао Моутиньони олиш Рим клубига ортиқча муаммо туғдирмайди. 35 ёшли футболчи бир ойдан кейин эркин агентга айланади ва ёши ўтиб қолгани учун жиддий клублар унга эътибор қаратгани йўқ.

Моуриньо эса ўз ҳамюртининг катта тажриба тўплаганини инобатга олиб, унинг “рома”га фойда келтиришига ишонмоқда.

Ҳимоячига икки харидор бор!

“Рома” ҳимоячиси Мараш Кумбулла ўз юртида ўтказилган Конференциялар лигаси финалида майдонга тушмади. Ҳал қилувчи беллашув Албаниянинг Тирана шаҳрида ўтказилди. Албанияликлар ўз ҳамюртлари Кумбулла ҳурматидан “Рома”га ишқибозлик қилди.

Жозе Моуриньо эса финал мезбонлар кутган ўйинчини майдонга туширмади.

Маълумотларга қараганда, бу ўйинчига ёмон таъсир қилган. Кумбулла ёзда бошқа жамоага ўтишни режалаштирмоқда.

Аслида Кумбулла А Сериянинг бошқа клуби – “Верона” тарбияланувчиси ҳисобланади. Аввал уни бир мавсум ижарада ўйнатган римликлар ўтган йили ёзда 26,5 миллион евро тўлаб, Кумбулланинг трансфер ҳуқуқини тўлиқ сотиб олган эди.

Энди Мараш ўз имкониятларини бошқа клубда синаб кўриши мумкин. Манбаларнинг таъкидлашича, унга А Сериянинг ўзидан таклифлар туша бошлади.

Ҳозирча 22 ёшли марказий ҳимоячига “Фиорентина” ва “Торино” жиддий қизиқиш билдирмоқда. Футболчининг амалдаги шартномаси 2025 йилнинг ярмигача давом эттишига қарамай, ҳозирда унинг нархи арзоланган.  Трансферларга ихтисослашган transfermarkt портали Кумбуллани 18 миллион еврога баҳоламоқда.

Бирортанг Шомуродовга етолмадингку!

“Спартак” Ўруновни суҳбатга чорлади. Мақсад аниқ!

Легионеримиз: Мураббий мен билан гаплашмай қўйди!