Шомуродов мажбурий карантинга тушди. Энди нима бўлади?

Россия премьер-лигаси баҳсларининг қайта тикланиши, хусусан “Ростов” ва унинг энг зўр ҳужумчиси Элдор Шомуродовнинг ўйинларини томоша қилишни миллионлаб ўзбекистонлик футбол мухлислари ҳам интиқлик билан кутаётган эди. Бугун "Ростов" сафар учрашувида "Сочи" билан куч синашиши керак эди.

Бироқ, чемпионат тикланиши арафасида “Ростов”нинг олти футболчисида коронавирус аниқланиши россиялик футбол мутасаддиларини мураккаб вазиятга солиб қўйди. Тезкор чора сифатида Элдор Шомуродов ва унинг жамоадошлари икки ҳафталик мажбурий карантинга олинди. Қолганлар эса буёғига нима қилиш ҳақида бош қотирмоқда.

Россия футбол иттифоқи ва Премьер-лигаси раҳбарияти мавсумни қайта тиклаш учун пухта тайёргарлик кўрмагани ошкор бўлди. Гарчи уч ой давомида футболни қайта тиклаш, тиббий протокол ишлаб чиқиш, уни тегишли органлар назоратидан ўтказиш ва рухсат олиш, томошабинларни жалб қилинишини чеклаш каби қатор муаммолар ҳал этилган бўлса-да, “Ростов”даги вазиятдан сўнг, мутасаддиларнинг назаридан четда қолган долзарб масалалар ҳам борлиги бўй кўрсата бошлади.

Ҳозир касалликка чалинган Роман Еременко, Деннис Хажикадунич, Хорен Байрамян, Матиас Норманн, Ивелин Попов ва Арсений Логашовни айблаш энг тўғри қарор эмас. Лекин бунга кимдир жавобгар бўлиши керакку.

Тиббий протоколга кўра, футболчилар мунтазам тест топшириши керак. Бундай вазиятда қандай қилиб олти киши касалланиши  мумкин? Айни пайтда инфекция манбасини аниқлаш қийин бўлса-да, сабаби аниқ – “Ростов”да карантин қоидалари қўпол тарзда бузилган ёки санитария тартибларига амалга қилинмаган.

Бунга ким айбдор?

Соҳа мутахассислари “Ростов”нинг ўзини айбламоқда. Агар жамоа базасида санитария тартиблари бузилган бўлса, бу клуб раҳбариятининг лоқайдлиги ва айби. Футболчилар ёки бир футболчи коронавирус илаштириб олган бўлса, бунга ҳам карантин қоидаларини ва жамоани хавфга қўйиб бўлмаслигини ўйинчиларнинг онгига сингдиролмаган, уларнинг хатти-ҳаракатини тўлиқ назоратга ола билмаган клуб маъмурияти жавобгар!  

Германия бу борада тўғри ечим топа олди. Чемпионат тикланишидан аввал, жамоалар меҳмонхоналарга жойлаштирилди ва ташқи олам билан мулоқот умуман тўхтатилди. Ҳатто тиш пастаси олиш учун дўконга чиқиб келган “Аугсбург” бош мураббийи мажбурий карантинга олиниб, жамоасининг дастлабки ўйинини ўтказиб юборди. Немислар тутган йўл чемпионатни белгиланган муддатда якунлаш имконини беради.

Россияда эса ҳали бошланмаган чемпионат жиддий муаммоларга дуч келмоқда. Олдинда  ўйинларга мухлисларни киритиш масаласи ҳам бор. Ўзини эҳтиёт қилолмаган клуб мисолида томошабинларни назорат қилишнинг имкони йўқлиги кўриниб қолди. Тиббиёт протоколи идеал ечим эмаслиги ҳам ошкор бўлди. Бундан вазиятда клубларнинг ўзи эҳтиёт чораларини кўриши талаб этилади. Ҳозирча буни 15 та жамоа уддаламоқда. Лекин “Ростов” панд бериб қўйди.

Вазиятни ўрганаётган мутахассислар “Ростов” учун асосан учта вариантни таклиф этмоқда. Булар –  чемпионат ўйинларига ростовликларнинг иккинчи таркибини қўйиш, учрашувларни кўчириш ва жамоага техник мағлубият ёзиш. Агар майдонда ёшлар тўп сурса, “Ростов” Чемпионлар лигасига йўлланма олиш орзусидан мосуво бўлади. Элдор Шомуродов ҳам тўпурарлар баҳсидан чиқади. Ўйинлар кўчирилиши шундоқ ҳам тиғиз тузилган тақвимни бузиб юборади. Карантин вақтида жамоага мағлубият ёзиш эса қоидага зид.

Ана энди кўрамиз, россиялик футбол мутасаддилари мураккаб вазиятдан қандай чиқиб кетар экан?