"Шомуродов қўнғироқ қилди, "Женоа"дан таклиф бўлишини кутмагандим, "Пахтакор" қаршилик қилмади" - Италияга кетаётган Иброҳимхалил Йўлдошев билан суҳбат

“Пахтакор” ва Ўзбекистон миллий терма жамоасининг иқтидорли ҳимоячиси Иброҳимхалил Йўлдошев тез орада легионерга айланиши кутилмоқда.

Ёдингизда бўлса, ушбу футболчига яқинда Италиянинг “Женоа” клуби жиддий қизиқаётгани ва Йўлдошевни сотиб олиш ҳаракатига тушиб қолгани хусусида хабар бергандик.

Ҳозирги пайтга келиб футболчимизнинг Европага кетиш ишлари қандай кечяпти? Мазкур масалага ойдинлик киритиш мақсадида sports.uz мухбири Иброҳимхалил Йўлдошев билан суҳбатлашди.

- Сизга Италиянинг “Женоа” клубидан таклиф бўлганини ва бу борада музокаралар олиб борилаётганини эшитгандик. Айни пайтда воқеалар ривожи қандай тус оляпти?

- Трансфер ҳақидами? Терма жамоа билан Саудия Арабистонига боргандик. Ўша пайтда менга Бельгиядан таклиф бўлди. Лекин “Женоа” варианти Бельгия клубининг таклифидан олдин мавжуд эди. Агентимга вазиятни тушунтирдим ва бельгияликлардан таклиф бўлаётганим ҳақида айтдим. У ўзим гаплашаман, деди. Хуллас, кейин Бельгия варианти тўхтатилди. Чунки менинг олдимда “Женоа” таклифи турганди. Шу сабабдан, бошқа қизиқишларга эътибор қилмадик. Агентим менга Италияга кетадиган бўляпмиз, деб айтди. “Женоа” клуби Худо хоҳласа, мени сотиб олади. Улар билан шартнома тузганимдан кейин мени бошқа жамоага ижарага беради.

- Ҳа, ўйин амалиётига эга бўлиш учунми?

- Тўғри, худди шундай, бир йилга. Ҳозир “Женоа”да мен ўйнайдиган позицияда бошқа ҳимоячи бор. Мен қайтгунимгача унинг шартномаси тугайди. Балки шундан кейин “Женоа”да қоларман. Режа бўйича, италияликлар мени сотиб олиб, ижарага бермоқчи.

- Бундан чиқди, сизнинг трансферингиз ижобий ҳал бўлди, десак бўлаверадими?

- Шунақа. Оз қолди, Худо хоҳласа.

- Сир бўлмаса, Бельгиянинг қайси клубидан таклиф тушганди?

- Эслай олмаяпман. Номи унчалик ёдимда қолмаган.

- Элдор Шомуродовдан кейин “Женоа” клубининг ўзбек футболчиларига эътибори ортяпти. Аммо ўйинчиларимиздан қанот ҳимоячиларининг легионер сифатида четда, айниқса, Европа чемпионатларидан бирида тўп суриш жуда қийин ҳисобланади. Ўзингизни Европада легионер сифатида тўп суришга ҳар жиҳатдан тайёрман, деб ҳисоблаяпсизми?

- Тўғри айтасиз, ҳимоячи бўлсам-да, менга шундай таклиф бўлди. Ўйлашимча, “Зенит”да ўйнаган ҳимоячи ҳам у ерга кетган. Ростини айтаман, “Женоа”дан таклиф бўлади, деб кутмагандим. Худо хоҳласа, менга билдирилаётган ишончни оқлашга ҳаракат қиламан. Четда тўп суришга тайёрман, деб ўйлайман. Мақтаняпти демангу, аммо янги клубга ўтганимда ўзимни кўрсата оламан, деб умид қиламан. Ҳар томонлама ижобий натижа кўрсатишга ҳаракат қиламан.

- Қачон кетишни мўлжаллаяпсизлар?

- Узоғи билан бир ойда.

- “Женоа”нинг таклифи ҳақида Шомуродов билан гаплашган бўлсангиз керак-а?

- Элдор ака менга бир ойча олдин телефон қилганди. Эшитдингми, сенга “Женоа” қизиқяпти, шунинг учун тайёр тур, кетиб қолишинг мумкин, деб мени огоҳлантириб қўйганди. Мен ҳам ўшанда Элдор акага, ҳа, эшитдим, дегандим.

- Сизнинг Италияга кетишингизга “Пахтакор” клуби қандай муносабатда бўляпти? Қўйиб юборишга қаршилик қилмаяптими?

- “Пахтакор” билан шартномам келаси йилнинг охиригача мўлжалланган. Шартномамга кетиш суммаси ёзиб қўйилган. Менга қандай клубдан таклиф бўлса ҳам шартномамда аниқ сумма кўрсатиб қўйилган. Ўша маблағни тўласа, кетсам бўлади. Лекин “Пахтакор” кетишимга қаршилик кўрсатгани йўқ. Мени қўйиб юборишга рози.

- Лекин “Пахтакор” бош мураббийи Питер Хюистра охирги пайтларда сизни негадир захирада қолдирди. У билан муносабатингиз қандай?

- Хюистра билан муносабатим яхши. Мени захирада қолдираётганини билмайман, ўзим ҳам ҳайронман. Таркиб танлашни мураббий ўзи ҳал қилади.

- Энди сиз кучли чемпионатга кетишга тараддуд кўряпсиз. Бундай вазиятда илк бор легионерга айланаётган ўйинчида бошқача ҳаяжон бўлиши табиий...

- Агентим ҳам айтди, борганингдан кейин шок ҳолатига тушиб қолма, деяпти. Хюистра ҳам бир-икки кун аввал ёнига чақирди. Мендан “Женоа” клубига кетаётганим аниқ бўлдими, деб сўради. Қайси клубга қўшилсанг ҳам, у ердаги шароитга тез мослашиб кетгин, мураббий нимани хоҳлаётганини тезроқ тушуниб ол, дея менга ўз маслаҳатларини берди. Тайёргарлигим яхши, у қадар ҳаяжонланаётганим йўқ. Барибир четга кетаётганда бошқача бўлади. Мослашишга озгина вақт керак, деб ўйлайман.

- “Женоа” клуби сизни қайси клубга ижарага бериши аниқми?

- Йўқ, ҳали аниқ эмас. Яқин кунларда ҳал бўлиб қолса керак. Балки “Женоа”га қўшилганимдан кейин ойдинлашиб қолар, мен ҳали билмайман.