Шота Арвеладзе: Сафимиздаги айрим футболчиларнинг ўйинини кўриб, ёқтириб қолишингиз мумкин

Эртага ОЧЛ 4-турида "Пахтакор" сафарда "Ал Садд" меҳмони бўлади. Бугун ўйиндан олдинги матбуот анжумани ўтказилди. Унда "шерлар" устози Шота Арвеладзе иштирок этиб, қуйидаги фикрларни билдириб ўтди.

- Эртага бизни қийин ва қизиқарли ўйин кутмоқда. Турнир жадвали ва очколардан келиб чиқсак, ўта аҳамиятли тўқнашув. Ҳар икки жамоа футбол ўйнашга интилади. Мухлислар чиройли ва ҳужумкор футбол кўришади деб ўйлайман.

Гуруҳимизда кучли жамоалар жамланган. Кимнингдир ғалабаси мен учун сюрприз бўлмайди. Барча жамоаларда имконият бор. Бизда баъзи ўзгаришлар бўлиши мумкин, буни эртага кўрасиз.

Доҳада қандайдир бошқача ўйин бўлади деб ўйламайман. Ҳар икки жамоа тўпни назорат қилишга, ҳужум уюштиришга интилади. Сафимизда ўзини кўрсата оладиган футболчилар бор, уларнинг ўйинини ёқтириб қолишингиз мумкин.

Рақибни Тошкентдаги ўйиндан кейин янада ўргандик. Баъзи камчиликларини билдик, ўзимиз учун хулосалар чиқардик. Эртага бундан фойдаланишга уринамиз.