Shota Arveladzega Niderlandiyadan yangi yordamchi keldi. U Xyuistra emas!

“Xall Siti” klubini yaqindan beri boshqarishga kirishgan Shota Arveladze o‘ziga yordamchi murabbiyni chorladi. Endilikda Piter van der Vin “Xall Siti”ning murabbiylar shtabidan o‘rin oldi. Bu xususida Shota Yustinovich shunday dedi:

“Men Piter van der Vin “Xall Siti” jamoasiga kelib ishlashga rozi bo‘lganidan juda xursandman. Uning taktik o‘yin haqidagi tajribasi va o‘ziga xos ish uslubi barcha futbolchilarga, ayniqsa, yoshlarga juda ham foydalidir. Men u bilan birga hamkorlik qilishni juda ham istayapman. O‘z navbatida jamoadagilar ham bu mutaxassisni intiqlik bilan kutmoqdalar”.

49 yoshli Piter van der Vin niderlandiyalik bo‘lib, u ushbu yurtning turli yoshdagi terma jamoalarida ishlagan. 

Ungacha “Paxtakor”da birga ishlagan yordamchisi va keyinchalik bosh murabbiyga aylangan Piter Xyuistraning Arveladze bilan birga ishlashi to‘g‘risida xabarlar chiqqandi. Aksiga olib, hozircha bu xabar tasdig‘ini topgani yo‘q va ko‘rib turganingizdek, Arveladze boshqa mutaxassisni ishga jalb qildi.

Eslatib o‘tamiz, “Xall Siti” Shota Yustinovich boshchiligida hozircha uchta o‘yin o‘tkazib, bir uchrashuvda g‘alaba qozondi va ikkita bahsda yutqazdi. Bugun “Xall Siti” futbolchilari “Fulxem”ga qarshi maydonga tushishadi.