Шу иш ўхшамаса, Флик “Барса”дан кетади

“Барселона”ни Испания чемпионига айлантирган германиялик мутахассис Ханс-Дитер Флик клубдаги фаолияти муваффақиятли давом этаётганига қарамай, Каталонияни тарк этиши мумкин.

Флик узоқ йиллар клубни бошқариб келган Жоан Лапорта клуб президентлиги лавозимига қайта сайланмаса, “Барселона”дан кетади.

Бу ҳақда журналист Флориан Плеттенберг Х ижтимоий тармоғидаги саҳифасида хабар берди.

Аслида немис мутахассиси “Барселона” билан шартномани узайтиришдан манфаатдор. Флик шаҳарни, клубни ва мухлисларни яхши кўради. Бироқ мураббий ўз келажагини Жоан Лапортанинг Каталония клубидаги мавқеи билан боғламоқда ва у билан биргаликда жамоа стратегиясини шакллантиришни истайди.

Агар Лапорта 15 март куни “Барселона” президенти лавозимига қайта сайланмаса, Фликнинг клубдан кетиши шу ёзда ёки 2027 йилдаги шартнома муддати тугагач, амалга ошиши мумкин.