Шуҳрат Мақсудов:

“Бунёдкор” бош мураббийи Шуҳрат Мақсудов “Насаф”га қарши ўйиндан кейин таассуротлари билан ўртоқлашди.

- “Насаф” ёқтирган жамоам, буни тўғри тушунинглар. Ўзим “Бунёдкор” мураббийиман ва жамоам учун жонимни ҳам бераман. Фақат олдин ҳам айтганман, “Насаф” билан “Бунёдкор” бир-бирига ўхшаш жамоалар. Шунинг учун фурсатдан фойдаланиб, “Насаф” жамоасига яқинлашиб келаётган ОФК Кубогида омад тилайман. Ўйинга келсак, жуда қизиқарли учрашув бўлди, буни олдиндан билгандим. Афсуски, дастлабки дақиқаларда кўп хатоларга йўл қўйдик. Голни ҳам ўзимизга-ўзимиз олиб келдик. 20-дақиқадан кейин футболчилар ўзига келишди. Кейин биз хоҳлаган ўйинни кўрсатишди. Иккинчи бўлимда вазиятларимиз кўпроқ бўлди. Футболчиларга раҳмат айтмоқчиман.

- Мираҳмадов жамоангизда етакчи ҳужумчилардан бири. Нега уни захирада сақлаяпсиз?

- Йил бошида бизда футболчилар борасида бироз муаммолар бўлди. Асосий таркибдан олти нафар ўйинчи кетган. Уларнинг ўрнини тўлдира олмаганмиз. Ҳозир ҳимояда ҳам, ҳужумда ҳам изланяпмиз. Фақат ўзимизнинг ички академиямиздан излаяпмиз. Лекин ҳали бир тўхтамга кела олмаяпмиз. Бугун яхши ўйнаса, кейингисида ўзини кўрсата олмаяпти. Шунинг учун барчага имконият беряпмиз. Бугун Мираҳмадов захирадан майдонга тушиб ўйинни кучайтира олишига ишонгандим. Унинг имкониятларини яхши биламан. Операциядан сўнг, тикланиш жараёнида.

- “Бунёдкор” биринчи бўлимда ҳимоявий, иккинчи бўлимда ҳужумкор ўйнади. Бу сизнинг тактикангизмиди?

- “Насаф” билан очиқ ўйин кўрсатиб бўлмайди. Боз устига биз Қаршида ўйнадик. Рақибни ҳурмат қилган ҳолда ҳимоядан ўйнадик. Бироқ гол ўтказгач, бизда йўқотиш учун ҳеч нима қолмади, шу боис ҳужумга ўтдик.

- “Бунёдкор” кейинги босқичга чиқди. Кубокда кўзланган мақсад нима?

- Биласизми, мақсадимиз ҳар бир жамоа сингари ўйинларда ғалаба қозониш ва чиройли ҳаракат қилиш. У ёғини вақт кўрсатади.

- Баъзи ҳолатларда асабийлашганингизни кўрдик. Нималардан кўнглингиз тўлмади?

- Ҳамма ҳар хил тушуниши мумкин. Асабийлашишим ўз ўйинчиларимнинг хатолари ва имкониятлардан фойдалана олмагани билан боғлиқ эди. Бошқа ҳеч кимга эътирозим йўқ. Бу – футбол ва унда ҳеч ким бефарқ қараб турмайди. Жим турган инсонгина бефарқ бўлади.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Akbarali Abdunazarov
29/04/2021 09:22
Мен сенга тегмайман, сен менга тегма уйини булди!