“Шунча қилганимни…” Суперлиганинг 3 туридаги  қовунлар “ТОП 5”лиги

Эндиликда, SPORTS.uz Суперлига тур якунларига кўра энг  “яхшилар”ни аниқлаб боради. Хўш, учинчи турда кимлар ўзини ёмон томондан қолганлардан кўра "яхшироқ" кўрсатди? Бизда бешта вариант бор. Матн катталашиб кетмаслиги учун қисқа ва лўнда тушунтирамиз!

5-ўрин. Николай Тарасов / Рустам Лутфулин – айбсиз айбдор

“Кучли бешлик”ни бир воқеанинг икки антиқаҳрамони очиб беради. Шунақаси ҳам бўладими? Бир эпизоднинг икки қаҳрамони ҳам якунда “калла қўйди”. “Қизилқум” ҳимоячиси Николай Тарасов ҳакам пенальти нуқтасини кўрсатгани учун Рустам Лутфулинни кескин ҳақорат қилгач (онасидан сўккан дейишмоқда) боши узра қизил карточкани кўрди. Рефери ВАРни кўриб, хато қарор қабул қилганини тан олди ва 11 метрлик нуқта бериладиган зарбани бекор қилди. Дахшат-а? Якунда, Рустам шошиб нотўғри қарор қабул қилгани учун ўз имиджига путур етказди. Бунга реакция билдирмоқчи бўлган Тарасов учун ўйин эрта якунланди. Бу ерда “Қизилқум” футболчисини оқлашнинг имкони йўқ. Бу кўчадаги дўстлар билан йиғилиб, 25 минг сўмдан пул ташлашиб, майдонни 2 соат ижарага олиб тўп тепиш эмас. Профессионал лига! Оғзидан чиқаётган сўзларига бўлган эътиборсизлик “Қизилқум”ни жуда муҳим очколардан маҳрум қилди. Ҳакам эса бироз пауза ушламагани учун ўзи истамаган ҳолда баҳс натижасига таъсир кўрсатиб қўйди. Барчасини четдан томоша қилган “Металлург” битта гол уриб, мавсумдаги илк  3 очкосини ишлаб олди.

4-ўрин. Остон Ўрунов – жамоасига ортиқча ёрдам бериб юборган “халоскор”

Бугун бу баҳс ҳақида кўп ва ҳўп тўхталамиз. Сабаблар бисёр. Самвел Бабаян “шерлар”га қарши ўйлаб чиққан ўйин механизми 1:30 сония ҳам текшириб олишга улгурмай қолди. Ўйин стартидаёқ Остон Ўрунов қўпол хато қилиб тўпни ўз жарима майдончаси олдида олдириб қўйди. Қарабсизки, Алижоновнинг узатмасини Сайфиев дарвозага михлаб қўйди. Тамом. Режа, стратегия, олдиндан ўйлаган барча нарса бир зумда расво бўлди. Остон ўзи билмаган ҳолда “Навбаҳор” кучли босим остида қолиб кетишига сабабчи бўлиб қолди. Кейин айбини ювиш мақсадида агрессив ҳаракатларни бошлади. Сариқ карточка олди ва иккинчи бўлимда мураббий ўзини босолмаётган шогирдини захирада қолдирди. “Лочинлар” аъзоси ўша куни ўзи истамаган ҳолда жамоасига панд бериб қўйди.

3-ўрин. Абдулвоҳид Ғуломов – “шамоллар ҳукмдори”

Ия, “Андижон” ҳимоячиси бу ерларда нима қилиб адашиб юрибди, деб ҳайрон бўлманг! Водийда “бургутлар”нинг “Бунёдкор” олдида ип эшолмай қолишида Абдулвоҳид Ғуломов “қўлидан келган барча ишни” қилди!

Биринчи эпизод: 3 шериги турган бир пайтда, тўпни боши билан 2 метр масофага аниқ етказиб бера олмади. Натижада, биринчи гол ўтказиб юборилди. Биринчи голда Ғуломов бемалол айбни тўлиқ ўз бўйнига олиши мумкин.

Иккинчи эпизод: Ўз зонасини ҳимоя қилиш мақсадида Дониёр Абдуманноповни ортидан қувган футболчини ҳаракати ёш ҳимоячилар учун чинакам антиўрнак вазифасини бажариб бериши мумкин. Персонал ўйнаётган рақибни зарба зонасига ортиқча қийинчиликсиз чиқишини “таъминлаган” йигит ўзи истамай “Андижон” дарвозасига иккита гол “олиб келди”. Қанот ҳимоячилари “катта ўйинлар”ни жамоаси учун ютиб бераётган бир пайтда, Ғуломов ҳудди шу ишни тескарисини қилди. "Ўта гўзал"!!!

2-ўрин. Вадим Агишев – “компасини йўқотган йўловчи”

Бош ҳакам ўйинни яхши бошлади, кейин воқеалар ривожи ундан илгарилаб кетди. Биринчи пенальтининг бор ёки йўқлигини аниқлагунимизга қадар Темурхўжа Абдуҳолиқовнинг 50/50 вазиятда урган голи ҳисобга олинмади. Кўп ўтмай, баҳсли яна бир пенальти белгилади. Умуман олганда, баҳс анализ қилинса, деярли барча муҳим эпизодларда ҳакам биринчи планга чиқиб кетганини кўриш мумкин. Ўйиндан сўнг ЎзФҲМ расман ҳакамлар қабул қилган қарорлар экспертлар томонидан кўриб чиқилишини эълон қилди. Вазиятни ҳамма ҳар ҳил талқин қилмоқда. Шунга қарамай, 3-турнинг марказий баҳсида асосий “қовунни туширган” Агишев эмас…

1-ўрин. Йован Жокич – “Шунча қилганимни…”

Бир киши кам бўлиб қолиб, ҳакам томонидан қўшиб берилган дақиқада 11 метрлик нуқтадан ноаниқ зарба йўллаган Жокич “ТОП-5”да қолганлардан анча илгарилаб кетганча биринчи поғонани банд этди.

Зарбани томоша қилинг!

Йован энг муҳим паллада, босимни енгиб ўтиб, жамоаси учун омадсиз ўйинни 1 очкога айлантириши мумкин эди. “Навбаҳор” ишқибозлари ҳали-ҳамон амалга оширилмаган пенальти акс этган видеони томоша қила олишмаяпти.

Болқонлик йигит нафақат 3-турнинг, балки чемпионатнинг бурилиш нуқтасини ясаб бериши мумкин бўлган пенальтини кўкка совурди. Ундан бошқаси бу турда биринчи ўринга лойиқ эмас!

Норбой Муаллим