Shunchaki dahshat: Ikki ekspert Husanovga narx belgiladi!

Abduqodir Husanov yorqin o‘yinlari bilan qisqa fursatda “Lans” asosiy aktiviga aylandi. Bugungi kunda 20 yoshli o‘zbek futbolchisini qo‘lga kiritishga Frantsiya, Angliya, Ispaniya, Germaniya va Italiya kabi “top-5” ligalardan o‘ndan ziyod katta klublar da’vogarlik qilmoqda.

Garchi Transfermarkt portalida hamyurtimizning transfer summasi 12 million evroga ko‘tarilgan bo‘lsa-da, lansliklar o‘z kashfiyoti uchun xaridorlardan bundan bir necha baravar qimmat narx talab qilishi aniq.

Xo‘sh, bugungi kunda Abduqodir Husanovning asl transfer narxi qancha? “Lans” legionerimiz transferidan qancha pul ishlab olishi mumkin?

Bu kabi savollarni nufuzli manbalardan biri – butfootballclub.fr portalining ikki eksperti Uilyam Tertrin va Loran Xess muhokama qildi.

Sports.uz portali ikki ekspertning Abduqodir Husanov transfer summasi haqidagi fikrlarini o‘zbekistonlik futbol ishqibozlari e’tiboriga havola etadi.

Uilyam TERTRIN: 40 million evro

- “Lans” himoyachisi Abduqodir Husanov joriy mavsumda yorqin o‘yinlari bilan statistika mutaxassislarini shokka tushiryapti. Futbol tadqiqotlari markazi – CIES o‘z tadqiqotlari yakuniga ko‘ra o‘zbek legionerini 21 yoshgacha bo‘lgan futbolchilar orasida dunyoning eng yaxshi markaziy himoyachisi, deb topdi.

Shuningdek, “Lans” klubi Husanovning transferini tashkil qilish vazifasini taniqli futbol agenti Jorje Mendeshga topshirganini ham hammamiz yaxshi bilasiz. Bu borada muzokaralar 25-30 million evrodan boshlanishi belgilangan.

Agar biz o‘ziga xos xususiyatlarga ega bo‘lgan qishki transfer bozori oldida ekanimizni inobatga olmasak, o‘zbek futbolchisining asl narxi yuqorida ko‘rsatilgan summadan biroz yuqori. Menimcha, bu narx 40 million evroni tashkil qiladi. Chunki Husanovning Evrokuboklarda ishtirok etish tajribasi olti oy bilan cheklanadi xolos.

Abduqodir Husanov mavsumning ikkinchi yarmida ham shu darajada o‘yin ko‘rsatadigan bo‘lsa, transfer narxi ham muntazam oshib boradi va yozda “Lans” uni o‘z tarixidagi rekord narxga transfer qilishi mumkin.

Loran XESS: 40 milliondan 50 millionov evrogacha

Men bu mavsum “Lans”ning bir necha o‘yinini ko‘rdim va har gal Abduqodir Husanovning o‘yinidan hayratga tushdim. O‘zbek futbolchisi hali 20 yosh bo‘lishiga qaramay, katta tajriba egasi kabi murakkab vaziyatlarda ham juda xotirjam, sovuqqon o‘ynaydi.

Husanov baquvvatligi, saviyasi va engil harakatlari bilan menga Vilyam Salibani eslatib yubordi. Bris Samba uni “Monstr”, deb to‘g‘ri ta’rif bergan.

Abduqodir Husanov “Lans” uchun chempionatning eng daromadli o‘yinchilaridan biridir. “Marsel” va “Pari Sen-Jermen” uni nishonga olgani bejiz emas, lekin himoyachi uchun raqobat juda kuchli bo‘lishi hozirdan aniq. 

Grand klublar uni asosiy nishonlar ro‘yxatiga kiritmaganini, bir soniyaga bo‘lsa ham tasavvur qilmaslik imkonsiz. Bu yoshda, uning tengqurlari orasida Abduqodirga teng keladiganlari juda kam.

Bu qishdan boshlab, Husanov uchun haqiqiy kimoshdi savdosi ochiladi. Bir necha yil avval “Sent Eten” Uesli Fofanani “Lester”ga 40 million evroga qo‘shib yuborgan edi. Nega endi Husanovning transferi shu darajadagi narxdan boshlanmayapti. Agar “Lans” uni 30 million evrodan kamiga qo‘yib yuborsa, bu o‘ta omadsiz transfer bo‘ladi.

Hurmatli muxlislar, siz nima deb o‘ylaysiz, Abduqodir Husanovning asl transfer bahosi qancha? “Lans” uni qanchaga transfer qilgani ma’qul? Fikringizni izohlarda yozing...