Сидиқовга пенальтини ўртага тепишни ким маслаҳат берганди? Футболчи жавоб берди

Ўзбекистон кубоги финали доирасидаги "Насаф" - ОКМК учрашуви бўлиб ўтди. Унда мезбон қаршиликлар кичик 1:0 ҳисобида ғалаба қозонди ва кубок ғолиби бўлди. 

Ягона голни 71-дақиқада Жавоҳир Сидиқов киритди. У пенальтидан унумли фойдаланиб, жамоасига совринни қўлга киритишда улкан ҳисса қўшди. 

Беллашувдан сўнг Жавоҳир Сидиқов чемпионлик ҳақида ўз фикрлари билан ўртоқлашди: 

- Авваламбор, ассалому алайкум. Бугунги ташкилий ишлар ажойиб ўтди. Айниқса, якун биз учун зўр бўлди. Ўйинга келадиган бўлсак, мураббийлар учрашув олдидан бу қанчалик муҳим беллашув эканлигини таъкидлади. Бу йилги мавсум иккинчи финалимизни муваффақиятли якунлаб олдик. Албатта, тайёргарлик аъло даражада бўлди. Бутун "Насаф" мухлисларини ва Қашқадарё аҳлини ғалаба билан табриклаймиз.

- Пенальти - лоторея. Кимдир уради, кимдир эса ура олмайди. Буюк футболчилар ҳам пайтида адашган. Мураббийлар кимгадир бу вазифани юклатмайди. Кимнинг ишончи юқори бўлса, ўша зарба беради.

- Бизда пенальтини яхши тепадиган футболчилар кўп. Зафармурод Абдираҳматов ҳамда Азиз Амонов шулар жумласидандир. Улар менга ишонишди.

- Ўйиндан олдин мураббий агар иккилансак, ўртага тепиш кераклигини айтганди. Унинг айтганини қилдим.

- Жамоанинг кайфияти ҳар доим аъло даражада бўлиб келган. Бундан кейин ҳам шундай бўлади. Ички чемпионатда ҳам имкониятимиз бор. Шундай экан, максимал очко тўплашга ҳаракат қиламиз.