“Сити” ҳимоячиси Италия топ-клубларига шарт қўйди

“Манчестер Сити”нинг тажрибали марказий ҳимоячиси Натан Аке ёзги трансферлар ойнаси даврида ўзига бошқа жамоа топишига тўғри келади.

Айни пайтда нидерландиялик футболчига бир неча лигалардан қизиқиш бўляпти. Акенинг ўзига Италия чемпионати жозибадор кўринмоқда.

Бу ҳақда Eindhovens Dagblad ва Voetbal International нашрлари хабар бермоқда.

Манбага кўра, Натан Аке анчадан бери Италия А Серияга қизиқиш билдириб келади. Айни пайтда бу лига топ-клубларидан “Ювентус”, “Милан” ва “Рома” марказий ҳимоячини ўз таркибига қўшиб олишга тайёр.

Натан Акенинг розилигини олиш ва бу трансфер амалга ошиши учун ҳар учала жамоа келаси мавсумда Европа Чемпионлар лигасида иштирок этиш ҳуқуқини қўлга киритиши керак.

2020 йилдан бери “Манчестер Сити” шарафини ҳимоя қилиб келаётган Натан Акенинг шартномаси тугашига яна бир йил бор. Бироқ “шаҳарликлар” бу ўйинчини қўйиб юборишга қарши эмас.

Натан Аке терма жамоадаги жойини сақлаб қолиши учун мунтазам ўйин амалиётига эга бўлиши талаб этиляпти. Ҳозирги вақтга қадар ҳимоячи Нидерландия терма жамоаси сафида 58 та ўйин ўтказиб, бешта гол урган.