“Сити” Ҳусанов ёрдамида тарихий рекорд ўрнатди

“Манчестер Сити” икки нуфузли мусобақа – Англия кубоги ва Англия лигаси кубогидаги барча ўйинларда ғалаба қозонган илк клубга айланди.

“Шаҳарликлар” тарихда бир мавсум ичида Англия кубоги ва Англия лигаси кубогидаги барча учрашувларни юз фоизлик муваффақият билан якунлади.

Бу ҳақда Opta хабар берди.

Англия кубогида Хосеп Гвардиола шогирдлари “Эксетер Ситини 10:1, “Солфорд Сити”ни 2:0, “Ньюкасл Юнайтед”ни 3:1, “Ливерпуль”ни 4:0, “Саутгемптон”ни 2:1 ҳисобида мағлуб этди ва финалда “Челси”дан 1:0 ҳисобида устун келди.

Англия лигаси кубогида эса, манчестерликлар “Хаддерсфилд Таун”ни 2:0, “Суонси Сити”ни 3:1, “Брентфорд”ни 2:0, “Ньюкасл Юнайтед”ни 2:0 ва 3:1 ҳисобида мағлубиятга учратди, ҳал қилувчи баҳсда эса “Арсенал”ни 2:0 ҳисобида таслим қилди.

Ҳозирга келиб,  “Манчестер Сити” ҳисобида саккизта Англия кубоги ва тўққизта Англия лигаси кубоги бор.

Абдуқодир Ҳусанов “шаҳарликлар”нинг ғалабаси билан якунланган ҳар икки турнирда бештадан учрашувда майдонга тушиб, жамоаси муваффақиятига ўз ҳиссасини қўшди.