“Сити” Ҳусановга қизиққан “Реал”га 30 миллион евролик ҳамкорлик таклиф қилди
Европанинг икки гранд клуби – “Манчестер Сити” ва “Реал” қишки трансферлар ойнаси даврида ўзаро ҳамкорлик қилиши мумкин.
Аввалроқ, “Қироллик клуби” жароҳатлар туфайли жамоа ҳимоя чизиғида юзага келган инқироздан тез ва қулай чиқиш йўли сифатида “Манчестер Сити”да захирада қолиб кетаётган иқтидор эгаси Абдуқодир Ҳусановни ижарага олиш масаласини кўтарган эди.
Бу масалага эътибор қаратган экспертлар “Манчестер Сити” ўз хусусиятлари билан жамоага катта таъсир ўтказиши мумкин бўлган 21 ёшли ўзбек футболчисини қўйиб юбориши қийин эганини таъкидлади.
“Шаҳарликлар” мадридликларга бошқа вариантни таклиф қилмоқда. Тажрибали ҳимоячи Натан Акенинг Хосеп Гвардиола жамоасидаги келажаги мавҳум бўлиб турибди. Нидерландия терма жамоаси мураббийлари штаби 30 ёшли марказий ҳимоячига 2026 йилги жаҳон чемпионатида қатнашишни истаса, мунтазам ўйин амалиётига эга бўлиш талабини қўйди.
Бу талабдан кейин Натан аке ўзига янги жамоа қидиряпти. “Манчестер Сити” уни январь ойи учун трансферга қўйди.
Юзага келган имконият ортидан “Реал”га Натан Акенинг хизматлари таклиф қилиняпти.
Бу ҳақда Defensa Central хабар бермоқда.
Манба маълумотларига кўра, манчестерликлар 30 ёшли футболчи трансферидан 30 миллион евро ишлаб олишни кўзлаяпти. Бироқ, бу вариант “Қироллик клуби”га у қадар маъқул келмагани айтилмоқда.
Зотан, “Реал” 2026 йилга белгилаган трансфер сиёсатида жамоага тажрибали, таниқли ва катта маош сўрайдиган юлдузларни эмас, балки иқтидорли ва жамоага узоқ муддат хизмат қиладиган ёшларни олишни устувор вазифа сифатида белгилаган.
Шу ўринда, Натан Акега “Реал”нинг ашаддий рақиби “Барселона” жиддий қизиқиш билдираётгани ҳақидаги хабарлар ҳам кўпайиб бормоқда. Каталонияликлар ҳимоя чизиғида ҳам малакали кадрлар етишмовчилиги кузатилмоқда.
Натан Аке “шаҳарликлар” сафида 2020 йилнинг ёзидан бери тўп суриб келади. Футболчининг клуб билан меҳнат шартномаси 2027 йилнинг 30 июнига қадар амал қилади. Transfermarkt портали маълумотларига кўра, Акенинг бозор қиймати 18 миллион еврони ташкил этади.
Ҳусанов билан бирга ва унга қарши ўйнаган футболчиларни аниқлашди
Сиз футболни ўлдиряпсиз! Ўзбекистонга қаранг...
Гвардиола Ҳусановни танқид қилган мураббийни “разбор”га чақирди
Фикрлар