“Сити” Родри билан музокарани тўхтатди ва бошқа юлдузга ишонч билдирадиган бўлди

“Манчестер Сити” раҳбарияти клуб билан амалдаги шартномасининг якуний муддати яқинлашаётган икки футболчининг келажаги бўйича қарор қабул қилди.

Daily Mail нашрининг маълум қилишича, “шаҳарликлар” клуб тарбияланувчиси Фил Фоден билан 2027 йилнинг ёзида якунланадиган шартномани янгилайдиган бўлди. Спорт бўлими тез кунларда ўйинчининг вакиллари билан музокарани бошлайди.

Клуб мутасаддилари жорий мавсум бошида “Олтин тўп” соҳиби Родри билан ҳамкорликни узайтириш борасида  музокара бошлаганди. Ҳозир бу жараён тўхтатилди. “Манчестер Сити” хўжайинлари 29 ёшли испан футболчиси саломатлигини тиклаб олганидан кейин унинг келажагини яна бир бор ўйлаб кўрадиган бўляпти.

Жамоада сўнгги мавсумини ўтказаётган марказий ҳимоячи Жон Стоунзнинг келажаги мавҳум бўлиб турибди. “Шаҳарликлар” тажрибали ўйинчи мавсумни жиддий жароҳатларсиз ўтказган тақдирда унга янги битим таклиф қилиши мумкинлиги айтилмоқда.