“Сити” Семеньога қанча маош беради?

Англия Премьер-лигаси ғолиблиги учун курашаётган “Манчестер Сити” чемпионатнинг энг моҳир тўпурарларидан бири Антуан Семеньони ўз сафига қўшиб олишга жуда яқин турибди.

“Борнмут” жамоасининг қанот ҳужумчиси “Манчестер Сити” раҳбарияти билан шахсий шартнома шартларини келишиб олди.

Ганадан бўлган футболчи беш йиллик шартнома асосида ҳафтасига тахминан 150 минг фунт стерлинг (йилига 7,2 миллион фунт) маош олади. Шунингдек, шартномада бонуслар ҳам кўзда тутилган.

Бу ҳақда The Guardian нашри хабар бермоқда.

Манбага кўра, “шаҳарликлар” Семеньо учун компенсация тўлови сифатида “Борнмут”га 65 миллион фунт стерлингдан сал камроқ сумма тўлайди. Бу миқдорга садоқат бонуслари ва агентлик комиссиялари ҳам киради. “Манчестер Сити” ушбу суммани уч йил давомида бўлиб тўлашни режалаштирмоқда.

Жорий мавсумда Семеньо барча мусобақаларда 18 та ўйинда қатнашиб, тўққизта гол ва учта голли узатма муаллифи бўлди. Футболчининг клуб билан амалдаги шартномаси 2030 йил ёзигача амал қилади. Transfermarkt маълумотларига кўра, унинг бозор қиймати 65 миллион еврога тенг.