“Сити” янги йилгача катта трансферни якунлайди

Анлия премьер-лигасида тўпурарлик қобилиятини намойиш қилаётган “Борнмут” ҳужумкор футболчиси Антуан Семеньо янги йилгача “Манчестер Сити”га ўтади.

 Инсайдер Бен Жейкобс X ижтимоий тармоғида хабар беришича, 29 декабрь, душанба куни тўловлар тузилмаси бўйича олиб борилган ижобий музокаралардан сўнг жараёнда сезиларли илгарилаш кузатилган.

Манба маълумотларига кўра, Семеньо “Манчестер Сити” билан шартноманинг шахсий шартларини аллақачон оғзаки тарзда келишиб олган. Айни пайтда “Борнмут” ҳали ҳам футболчи “Челси”га қарши хайрлашув учрашувини ўтказишга улгуришига умид қилмоқда.

Англия Премьер-лигасининг 19-тур доирасидаги ушбу ўйин 30 декабрь, сешанбадан чоршанбага ўтар кечаси Тошкент вақти билан 00:30 да бошланади.

ОАВ маълумотларига кўра, Антуан Семеньонинг “Борнмут” билан амалдаги шартномасида 65 миллион фунт-стерлинг (75 миллион евро) миқдоридаги тўлов  банди кўзда тутилган. Бу сумма фақат 2026 йил 10 январга қадар амал қилади.

“Борнмут” ушбу банднинг амал қилиш муддатини атайлаб чеклаган, чунки клуб январь охиригача Семеньога ўринбосар харид қилиши талаб этилади.