“Сити” юлдузи катта рекорд ўрнатди

“Манчестер Сити” сардори Бернарду Силва Англия Премьер-лигасининг 32-турида “Челси” майдонида ўтказилган учрашувда ўзига хос тарихий кўрсаткич муаллифига айланди.

31 ёшли Силва Премьер-лигада иштирок этган португалиялик футболчилар орасида энг кўп майдонга тушган ўйинчи сифатида қайд этилди.

Шу куни Англия чемпионатидаги 297-учрашувини ўтказган “Сити” сардори ўз ҳамюртлари Луис Боа Морте, Криштиану Роналду ҳамда Бруну Фернандешдан ўзиб кетди.

2017 йилдан бери “шаҳарликлар” шарафини ҳимоя қилаётган Бернарду устози Хосеп Гвардиола қўл остида жами 19 та совринни қўлга киритган.

Премьер-лигада энг кўп ўйин ўтказган португалияликлар рўйхати қуйидагича кўриниш олди:

• Бернарду Силва — 297
• Луис Боа Морте — 296
• Криштиану Роналду — 236
• Бруну Фернандеш — 223

Эслатиб ўтамиз, Бернарду Силва “Манчестер Сити”даги сўнгги мавсумини ўтказмоқда. Тажрибали плеймейкернинг амалдаги шартномаси 30 июнь куни тугайди ва у клубни эркин агент мақомида тарк этади.