Siz qaysi o‘yinni tomosha qilasiz: "Liverpul" - MYu yoki "Atalanta" - "Jenoa"?

Bugun futbol muxlislari uchun ajoyib kun. Sababi, deyarli barcha chempionatlarda markaziy o‘yinlar bo‘lib o‘tadi. Ular orasida garchi teng kuchlilar qarama-qarshiligi kuzatilmasa-da, biz uchun ahamiyatli hisoblangan "Atalanta" - "Jenoa" uchrashuvi o‘rin olgan.

O‘zbekistonda genuyaliklarning har bir o‘yini Eldor Shomurodov borligi uchun diqqat bilan tomosha qilinmoqda. Sababi, hamyurtimizning harakatlari turdan-turga ochilib boryapti.

Bugun, shuningdek, Angliyada ham ajoyib qarama-qarshilik o‘tkaziladi. "Liverpul" azaliy raqibi "Manchester Yunayted" bilan kuch sinashadi. Ushbu bahs Toshkent vaqti bilan 21:30da boshlanadi. Inglizcha klasikodan yarim soat o‘tib, "Jenoa"ning o‘yini start oladi. Bu pallada tanlov qiyin masala, ammo birida O‘zbekiston milliy terma jamoasining hujumchisi borligi uchun ko‘pchilikda tarozining pallasi A Seriya tomon og‘ib ketishi mumkin. Yoki biz adashyapmizmi? Siz qaysi o‘yinni tomosha qilasiz: "Liverpul" - "Manchester Yunayted" yoki "Atalanta" - "Jenoa"? Fikrlaringizni qoldiring.