"Сўғдиёна" ҳам йиғинга киришяпти, таркибда ўзгаришлар бўлади

“Сўғдиёна”нинг қишки тайёргарлик режасига биноан, жамоа аъзолари бугун Тошкентда тўпланади ва машғулотлар пойтахтда олиб борилади. Таркибда эса албатта ўзгаришлар бўлади.

Бунгача клубни сербиялик дарвозабон Милан Митрович ҳамда ҳимоячи Шавкат Муллажонов тарк этгани ҳақида хабар бергандик. Шунингдек, ярим ҳимоячи Санжар Рашидов кейинги фаолиятини легионер сифатида хорижда давом эттириши ҳам эҳтимолдан ҳоли эмас.

Бундан ташқари, клуб тўпурари Шоҳруз Норхоновга “Локомотив”дан таклиф бўлганлиги ҳақида ҳам хабар бергандик. Тез орада унинг масаласига ҳам ойдинлик киритилади.

Шу билан бирга таркибга бир қатор янги ўйинчилар қўшилади, бу борада улар билан қизғин музокаралар олиб бориляпти. Масалан, “Сурхон”да тўп сурган Шавкат Саломовга қизиқиш мавжуд. Шу боис у ҳам жиззахликлар сафига қўшилиши мумкин.