"Сўғдиёна" ҳужумчиси жамоадан кетди

Жиззахнинг “Сўғдиёна” клубида бош мураббий ўзгариши ортидан жамоанинг айрим футболчилари ҳам жамоа билан хайрлашмоқчилиги ҳақида эшитиб қоляпмиз.

Хабарингиз бор, бунгача клубни бошқариб келган Улуғбек Бақоев истеъфога чиққан ва ўрнига Ёрқин Назаров тайинланган. Таркибда ўзгаришлар бўлиши аниқ.

Sports.uz сайтига маълум бўлишича, 3 йил давомида “Сўғдиёна” шарафини ҳимоя қилган ҳужумчи Баҳодир Насимов клубни тарк этган. Буни “Сўғдиёна” бош мураббийи Ёрқин Назаров сайтимизга берган интервьюсида ҳам айтиб ўтди.

35 ёшли футболчи якунига етган чемпионатда 12 та учрашувда майдонга тушган. Ўзбекистон Кубогида эса 5 та ўйинда иштирок этган. Лекин Насимов гол ура олгани йўқ. Қизиғи, ўтган мавсумда ҳам ҳужумчи рақиблар дарвозасини ишғол қила олмаган.