"Сўғдиёна" "Пахтакор" устидан қозонган ғалабасини кимга бағишлади?

Мавсумнинг дастлабки учта ўйинида ғалаба қозона олмаган “Сўғдиёна” жамоаси пандемиядан кейинги 4-турда амалдаги чемпион – “Пахтакор”ни қабул қилди ва ягона гол эвазига ғалаба қозонди.

Мазкур беллашувдан аввал жиззахликларнинг етакчиларидан бири Санжар Рашидов Sports.uz сайтига фикр билдириб, “Пахтакор”ни мағлуб этишларига ишонаётганини алоҳида айтиб ўтганди.

Кўриб турганингиздек, у сўзининг устидан чиқди ва “Сўғдиёна” мавсумдаги илк ғалабасини “Пахтакор” билан ўйинда қўлга киритди. Санжар эса беллашувдан кейин ўйин ҳақидаги таассуротлари билан ўртоқлашиб, ушбу ғалабани кимга бағишлаганини айтди.

- Ғалаба ўз-ўзидан бўлгани йўқ. Бунинг учун биз қаттиқ меҳнат қилдик. Машғулотларимизда мураббийларимизнинг кўрсатмаларига тўлиқ амал қилдик ва ғалабага шу тариқа эришдик.

“Пахтакор” устидан қозонилган ажойиб ғалабамизни мухлисларимизга бағишлаймиз. Гарчи улар стадионга кира олишмаган бўлишса-да, уйда телевизор орқали жамоамизни қўллаб-қувватлаб туришганини ҳис қилдик, - деди Санжар Рашидов Sports.uz мухбирига.