"Сосьедад"га қарши ўйинда "Реал"нинг 30 ўйинлик серияси якунланди

Испания Ла Лигаси 19-туридан ўрин олган беллашувда "Реал" Мадрид "Реал Сосьедад" билан голсиз дурангга имзо чекди.

Шу тариқа, "қаймоқранглилар"нинг жорий мавсум барча турнирлардаги 30 ўйиндан иборат голли серияси ниҳоясига етди. Анчелотти шогирдлари бундан олдинги 29 ўйиннинг барчасида рақиб дарвозасини камида бир маротаба ишғол қилганди.

Эътиборлиси, "қироллик клуби" сан-себастьянликлар пости томон нақд 20 бор зарба йўллади ва Алекс Ремиро шулардан еттитасини зарарсизлантирди.

Маълумот учун, мадридликлар навбатдаги баҳсни Тошкент вақти билан 2-дан 3 февралга ўтар кечаси 01:00 да "Валенсия"га қарши ўтказади.