SPORTS.uz талқини бўйича Суперлига 13-тур рамзий жамоаси (фото)

Бу тур марказий ўйинларга бой ўтди. Водий ва Тошкент дербиси кутилганидек шиддатли қарама-қаршилик юзага келишига сабаб бўлди.Табиийки, натижаси ўта муҳим бўлган марказий ўйинларда жамоалар эҳтиёткорлик билан ҳаракат қилади. Бу сафар ҳам шунга ўхшаш ҳолат кузатилди ва бу рамзий жамоа танлашда бироз қийинчилик туғдирди.

Дарвозабон: Валижон Раҳимов (AГМК)

Иккинчи ва учинчи поғонадаги клублар беллашувида олмалиқликлар ўзлари учун керакли натижани қайд этишга муваффақ бўлди. Албатта, бунда Раҳимовнинг ўрни сезилди. Бир неча вазиятларда дарвозаси дахлсизлиги сақланишини ўз сейвлари билан таъминлаган посбон ҳақли равишда рамзий жамоа дарвозасидан ўрин олмоқда.

Марказий ҳимоячи Ислом Қобилов (Локомотив)

“Насаф”га қарши ўйинда Қобилов анча ишончли ўйин кўрсатди. Тезкор ҳужумчиларга қарши ақлли футбол намойиш этган ҳимоячи рақиб ҳужумларини тўхтатишга муваффақ бўлди. Яккукурашларда фаоллик кўрсатиб, иккинчи қаватда ҳеч кимга имконият бермагани унинг рамзий жамоа учун муносиб эканлигини билдиради.

Марказий ҳимоячи Aвазбек Ўлмасалиев (Бунёдкор)

Жуда баҳсли қарор. “Тошкент дербиси”да имкониятни бой берган “Бунёдкор” таркибида Ўлмасалиев бошқаларга қараганда ажралиб турди. Киритилган гол ҳам бошқа ҳимоячининг хатоси эвазига юзага келди. Сўнгги ўйинларда тўхтатиш қийинлашиб бораётган Темировнинг дербида “йўқолиб қолиши” айнан Авазбек Ўлмасалиевга ҳам боғлиқдек, назаримизда.

Ўнг қанот ҳимоячиси Хожиакбар Aлижонов (Пахтакор)

Алижонов ҳар бир ўйинда шу қадар фаол ҳаракатлар амалга оширади-ки, уни рамзий жамоага жалб этмаслик қийин масаладек кўринади. Қаҳрамонимиз бу сафар ҳам қолганлардан бир бош ажралиб турди ва ўнг қанотни “ёндирди”. Балки шериклари унинг узатмаларини дарвоза томон тўғри йўллай олмагандир, лекин Алижонов фаолликдан тўхтамади.

Чап қаной ҳимоячиси Шахбоз Жўрабеков (Сўғдиёна)

АГМКга қарши ўйинда икки кучли мураббий тўқнаш келди. Майдоннинг ҳар бир қаричи ўлчанган ва эҳтиёткорлик биринчи планга чиққан ўйинда “бўрилар” ҳимоячиси фаол ҳаракат қилди. Орқа чизиқда ҳаракат қилишига қарамай, рақиб жарима майдонида хавф туҳдира олган Жўрабековни рамзий жамоа чап қанот ҳимоясига жойлаштирдик.

Таянч ярим ҳимоячиси Aзим Aҳмедов (Навбаҳор)

13-турда бир неча супер гол урилди. Улардан бири айнан Аҳмедовга тегишли. Доим шиддатли руҳда кечадиган “водий дербиси”ни ўз фойдасига ҳал этган наманганликлар айнан қаҳрамонимизнинг олис масофадан киритган голи эвазига ҳисобни очганди. Бундан ташқари, Аҳмедов майдон марказида ишончли ўйин кўрсатди ва рақиб ҳужумларини марказдаёқ тўхтатилишига бош-қош бўлди.

Марказий ярим ҳимоячи Иброҳим Играгимов (Металлург)

Жорий мавсум юқори даражага кўтарилган жамоалар - “Металлург” ҳамда “Қизилқум” беллашувида Актамов шогирдларининг қўли баланд келди. Бироқ бекободликлар ҳам шунчаки таслим бўлгани йўқ. Айниқса Ибрагимов узоқ масофадан берган зарбалари билан Нестеровни безовта қилиб турди. Ватсадзе ва Григалашвилининг голларига жавоб тариқасида урилган ягона гол ҳам айнан Аброҳим томонидан киритилганди.

Марказий ярим ҳимоячи Кахи Махарадзе (Локомотив)

Тажрибали ярим ҳимоячи “аждарлар” мағлубиятга учратилган ўйиннинг энг яхшиларидан бири бўлди. Боиси, катта ёшда бўлишига қарамай, Кахи майдон бўйлаб тинмай югурди ва умуман тинмади. Ёш ва чаққон “Насаф” футболчиларини тўхтатиш ва ўз жамоаси ҳужумларини бошлашда етакчи бўлган Махарадзе рамзий жамоамиз ярим ҳимоясида!

Ўнг қанот вингери Диёр Холматов (Пахтакор)

Ёш истеъдод соҳиби ўйиндан ўйинга ёрқинроқ порламоқда. Кетма-кет учрашувларда гол ёки ассист қайд этаётган вингер дербида ҳам ўзини йўқотиб қўймади. Ишонч билан рақиб жарима майдонига ёриб кирди ва пенальтига сабаб бўлди. Агар ўша вазиятга Эргашев қоидани бузмаганида, ғалаба голи муаллифи Черан эмас, Холматов бўлиши катта эҳтимол эди. Шу сабабли ҳам бир 11 метрлик нуқтадан гол урган Драган ўрнига унга шу вазиятни тақдим этган Диёрни танладик.

Чап қанот вингери Aзизбек Aмонов (Локомотив)

Амонов турнинг энг яхши футболчиси. Бунга ҳеч қандай эътироз йўқ. “Насаф” мағлуб этилган оқшом Азизни шунчаки тўхтатиб бўлмади. Ҳар икки голида Эшмуродовдек савияли ҳимоячини тезликда ортда қолдириб, чемпионатимизнинг энг яхши дарвозабонларидан бирини доғда қолдирган “темирйўлчилар” аъзосини чап қанот вингери позициясига жойлаштирдик.

Ҳужумчи Мате Ватсадзе (Қизилқум)

Юқорида мазкур турда чиройли голлар кўп киритилганини айтиб ўтдик. Ҳақиқий безакка айланган аниқ зарба грузиялик ҳужумчи томонидан киритилганини эътироф этмасликнинг иложи йўқ. Рақиб мудофаасини доимий босимда ушлаб турган Мате жамоасининг ғалабали одимлашига сабаб бўлди. Унинг голи эвазига “кончилар” 5-ўринга мустаҳкам жойлашиб олди.