SPORTS.uz'да жаҳон чемпионати кундалиги (9-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Нидерландия ҳам мезбонларни ранжитди. Қатар мундиаллар тарихида гуруҳ босқичининг барча ўйинларида мағлубиятга учраган ягона жамоага айланди.

Сенегал терма жамоаси Эквадордан нимчорак финал йўлланмасини тортиб олди. Сенегал 20 йилдан сўнг яна кейинги босқичга чиқди.

АҚШ принципиал баҳсда Эронни мағлуб этиб, плей-офф йўлланмасига эга чиқди. Америкаликлар илк бор форсларни енгди

Англия сўнгги турда йирик ҳисобда ғалаба қозонди, Рэшфорднинг голлари инглизларга кейинги босқич эшикларини очди.

Нидерландия - Қатар 2:0

Гуруҳ босқичининг ҳал қилувчи 3-тур ўйинлари старт олди. Илк икки учрашув "A" гуруҳи вакиллари ўртасида кечди. Параллел ўтган бу баҳсларда Нидерландия Қатар билан, Эквадор эса Сенегал билан куч синашди. Биз ҳозир "учар голландлар" ва "тўқ қизиллар" ўртасидаги тўқнашувга тўхталиб ўтамиз.

Беллашув 2:0 ҳисобида европаликларнинг ғалабаси билан якунланди. Биринчи гол мухлис ва мутахассисларнинг эътиборига тушаётган Коди Гакпо томонидан киритилди. У марказдан рақиб ҳимоясини ёриб кирди ва кучли зарбаси билан дарвозани ишғол этди.

Иккинчи тайм бошларида Луи ван Гал шогирдлари яна бир гол уришга эришди. Мезбонлар жарима майдонидаги тартибсизликдан сўнг "Барселона" ярим ҳимоячиси де Йонг фарқни 2 тага ошириб қўйди. 

Нидерландияликлар баҳсда учинчи голни уришга ҳам муваффақ бўлганди. Лекин 69-дақиқада юз берган ушбу вазиятда ҳакам тўп номинал мезбонлар футболчисининг қўлига текканини маълум қилди. Шу тариқа, гол инобатга олинмади ва натижа ўйин якунига қадар ўзгармай қолди.

Учрашувда илк гол муаллифи бўлган Гакпо мусобақа тўпурарига айланиб олди. Шунингдек, у урган голларининг 3 тасини танасининг турли қисмлари билан киритди. Сенегалга бош билан, Эквадорга чап оёғи ҳамда Қатарга ўнг оёғи билан гол урди.

Қатар терма жамоаси гуруҳ босқичининг барча ўйинларида ютқазган дастлабки мезбон мамлакат бўлди. Бундан олдин мезбон юрт вакиллари бундай ёмон натижа қайд этмаган. Нидерландия терма жамоаси ўзи иштирок этган ҳамма мундиалларда гуруҳ босқичидан чиқиш вазифасини уддалаган.

Эквадор - Сенегал 1:2

"А" гуруҳининг иккинчи ўйини биринчисидан фарқли ўлароқ анча шиддатли кечди. Сенегал у баҳсда Эквадорни 2:1 ҳисобида таслим этди.

44-дақиқада беллашувдаги илк гол урилди. Сарр пенальтидан унумли фойдаланиб, Сенегални ҳисобда олдинга олиб чиқди. 68-дақиқа ўтиб бораётганда Кайседо мувозанатни тиклади. Бурчак зарбасидан келган тўпни у бўш қолган дарвозага жойлаб қўйди.

Аммо орадан икки дақиқа ўтар-ўтмас, Кулибали қулай имкониятдан фойдаланди ва жамоасига ғалаба тақдим этган гол муаллифига айланди. Ушбу муваффақият якунда африкаликларни плей-оффга олиб чиқди.

Сенегал 20 йилдан кейин яна гуруҳдан чиқишга муваффақ бўлди. Ҳозир жамоага бош мураббийлик қилаётган Алиу Сиссе ўша пайтда терма сардори эди.

Эквадор сафидаги Эннер Валенсия бу беллашувда ҳам гол урганида, жаҳон чемпионатларида қаторасига 7 баҳсда гол урган илк футболчига айланарди. Бироқ у бундай натижага эриша олмади.

Шу тариқа, Сенегал 4 декабрь куни плей-оффда Англияга қарши майдонга тушади. Ўйин Тошкент вақти билан 00:00га белгиланган.

Эрон - АҚШ 0:1

3-турда Эрон - АҚШ баҳси ўтказилди. Унда шимолий америкаликларлар 1:0 ҳисобида рақибдан устун келди. 

Кристиан Пулишич томонидан 38-дақиқада киритилган гол беллашув тақдирини ҳал қилди.

Шу тариқа, очколари сонини 5 тага етказиб олган АҚШ кейинги босқич йўлланмасига эга чиқди. Эрон эса 3 очко билан учинчи поғонани банд этди ва ўз юришини гуруҳ босқичининг ўзидаёқ якунлайдиган бўлди.

Бу галги жаҳон чемпионатида АҚШ футболчилари гуруҳ босқичининг кетма-кет иккита беллашувида ўз дарвозаси дахлсизлигини сақлаб қолди. Худди шу кўрсаткични америкаликлар бундан қарийб юз йил муқаддам – 1930 йили Уругвайда бўлган биринчи жаҳон чемпионатида қайд этган эди.

Эрон - АҚШ терма жамоаларининг ўзаро учрашувларга эътибор қаратсак, бу ўйинга қадар улар тарихда 2 бор тўқнаш келган. 1998 йилги мундиал гуруҳ босқичи иккинчи турида АҚШ форсларга 2:1 ҳисобида мағлубиятга учраган. 2000 йили эса бу жамоалар ўртоқлик ўйини ўтказди. Ушбу баҳсга ғолиб номи аниқланмади - 1:1. Шу тариқа, АҚШ ўз тарихида илк бор Эронни таслим этди.

Энди АҚШ нимчорак финалда Нидерландия билан ўйнайди. Учрашув 3 декабрь куни Тошкент вақти билан 20:00да бошланади.

Уэльс - Англия 0:3

Англия 3-турда Уэльс билан куч синашди. Унда номинал меҳмонлар 3:0 ҳисобида зафар қучди.

Биринчи бўлимда томонлар дарвозаларга йўл топа олмади, аммо иккинчи тайм бошида "уч шерлар" Рэшфорднинг жаримадан йўллаган зарбаси эвазига ҳисобни очди. Чиройли ижро. 

Орадан кўп ўтмай, Фил Фоден орадаги фарқни оширди. Ҳимоячиларнинг хатосидан сўнг Харри Кейн тўпни олиб Фоденга ажойиб тарзда етказиб берди. У эса дарвозани ишғол қилди. Маркуснинг ўзи 68-дақиқада дублни расмийлаштириб, инглизларга йирик ҳисобдаги ғалабани тақдим этди.

Саутгейт шогирдлари очколари сонини 7 тага етказиб олди ва пешқадам сифатида плей-оффга йўл олди. Сўнгги поғонадаги Уэльс 1 очко жамғарган.

Хориж нашрларида ёзилишича, Англия ЖЧларидаги голлари сонини 100 тага етказиб олган. “Уч шерлар” бундай натижага эришган тарихдаги 7-терма жамоа бўлди. Аввалроқ, юзлик довондан Бразилия, Германия, Италия, Аргентина, Франция ва Испания ўтганди.

Англия терма жамоаси 100 та тўп киритиши учун 72 та ўйин керак бўлди. 1950 йилги мундиалда Чили дарвозасига урилган гол улар учун дастлабкиси сифатида қайд этилган.