Суд "Реал"нинг Негрейра иши бўйича ҳужжатлар талабини рад этди

Суд "Реал" томонидан Негрейра иши бўйича қўшимча ҳужжатлар тақдим этиш ҳақидаги сўровни рад этди.

Эслатиб ўтамиз, 2023 йилда "Барселона" ва унинг раҳбариятига Испания Қироллик футбол федерацияси (RFEF) қошидаги ҳакамлар техник қўмитаси собиқ вице-президенти Хосе Мария Энрикес Негрейрага тўланган маблағлар юзасидан пора бериш айби қўйилган эди. Суд 2001 йилдан 2018 йилга қадар "Барселона" томонидан Негрейрага бир неча миллион евро тўланганини жиноят деб баҳолаган.

Судда хусусий айбловчи сифатида иштирок этаётган "Реал" Негрейрага амалга оширилган тўловларга оид ҳужжатлар, жумладан аудиторлик текширувлари, комплекс текширув ҳисоботлари ва йиллик молиявий ҳисоботлар билан танишишни сўраган. "Барселона"нинг собиқ президенти Жозеп Бартомеу эса "Реал"нинг бу талабини рад этиб, мадридликлар ушбу материаллардан суд жараёнига алоқадор бўлмаган мақсадларда фойдаланиши мумкинлигини билдирган.

Суд "Реал"нинг 2003–2021 йиллар оралиғидаги молиявий ҳисоботлар, шу жумладан аудиторлик хулосаларига кириш ҳуқуқини бериш ҳақидаги талабини асоссиз деб топди ва уни қаноатлантирмади.

Бундан фақат "Барселона" биринчи жамоаси делегати Карлос Навалнинг кўрсатмалари мустасно бўлди. У 10 апрель куни бўлиб ўтадиган тингловда гувоҳлик беради. Қайд этилишича, "Реал" ушбу қарор устидан уч кун ичида шикоят қилиш ҳуқуқига эга.