Сульшер ғалаба голини киритган Роналдуни мақтади

Европа Чемпионлар лигаси 3-туридан ўрин олган баҳсда "Манчестер Юнайтед" Италиянинг "Аталанта" жамоаси устидан 3:2 ҳисобида ғалаба қозонди. Ўйиндан сўнг манкунияликлар бош мураббийи Оле-Гуннар Сульшер ўз фикрлари билан ўртоқлашди:

"Агар кимдир Роналдуни меҳнаткашлик борасида танқид қилмоқчи бўлса, шунчаки бугунги учрашувни томоша қилсин, у қандай ҳаракат қилаётганини кўрсин. Криштиану рақиб жарима майдони олдида шунчаки зўр ўйнайди.

Мен унинг ҳужумкор ҳаракатларидан жуда хурсандман. Ундан босим уюштиришини сўрагандик ва у буни уддалади. Томошабинларнинг қўллаб-қувватлаши ҳам ажойиб бўлди. Роналду марказий ҳужумчи қилиши керак бўлган ҳамма нарсани қилди. Гол унинг энг яхши ҳаракатлари самарасидир",-дея норвегиялик мутахассис сўзларини келтирмоқда "Daily Mail" нашри.

Маълумот учун, "қизил иблислар" 3-турдан кейин 6 очко тўплаган ҳолда, "F" гуруҳида пешқадамлик қилиб турибди.