Сульшер "Манчестер Юнайтед"га вақтинчалик мураббий сифатида қайтишга тайёр

Оле Гуннар Сульшер Рубен Аморим истеъфосидан кейин "Манчестер Юнайтед"га қайтишга тайёр эканини билдирди.

Бугун "қизил иблислар" Рубен Аморим бош мураббий лавозимидан четлатилганини расман эълон қилди. Журналист Рич Фэйнинг маълумотларига кўра, Сульшер жамоага вақтинчалик бош мураббий сифатида қайтишга рози.

Норвегиялик мутахассис аввалроқ 2018 йил декабридан 2021 йил ноябригача МЮни бошқарган. Унинг қўл остида жамоа Англия Премьер-лигасида икки марта иккинчи ва учинчи ўринларни эгаллаган, шунингдек, Европа Лигаси финалигача етиб борган.

Жорий мавсумда "Манчестер Юнайтед" АПЛда 20 турдан кейин 31 очко жамғариб, 6-ўринни эгаллаб турибди.

Аввалроқ клуб Аморим ўрнига асосий номзод сифатида "Кристал Пэлас" бош мураббийи Оливер Гласнерни кўриб чиқаётгани хабар қилинган эди. Шунингдек, "Ипсвич" бош мураббийи Киран Маккенна, "Челси"дан бўшатилган Энцо Мареска ва Германия миллий жамоаси устози Юлиан Нагельсманн номзодлари ҳам кўриб чиқилади. Клуб вақтинчалик мураббий тайинлаш вариантини ҳам истисно этмаяпти.