Супергол ва ассист: Ўзбек легионери ўйин қаҳрамони бўлди!

Ўзбекистонлик футбол ишқибозлари бу йилги Қозоғистон чемпионати Премьер-лигасида Туркистон вилоятининг “Турон” жамоасига мухлислик қилмоқда.  

Сабаби оддий – бу жамоа шарафини тўрт нафар ўзбек футболчиси – Шаҳбоз Умаров, Одилбек Абдумажидов, Хуршид Мухторов ва ёш ҳужумкор ўйинчи Беҳруз Асқаров ҳимоя қилмоқда.

Туркистонликлар мавсумнинг биринчи учрашувида Шаҳбоз Умаровнинг голи ва ассисти туфайли “Окжетпес”ни 2:0 ҳисобида мағлубиятга учратган эди. Бироқ кейинги икки беллашувда “Турон” Премьер-лиганинг кучли клублари – “Актобе” ва амалдаги чемпион “Қайрат”га бир хил – 1:2 ҳисобида ютқазиб қўйди.

Тўртинчи турдан ўрин олган “Қизил-Жар”га қарши учрашув ҳам сафарда тўп тепган туркистонлик учун муваффақиятсиз бошланди. Мезбонлар 36-дақиқадаёқ ҳисобни очди. Бироқ уларнинг хурсандчилиги узоққа чўзилмади.

Голдан тўрт дақиқа ўтиб, Шаҳбоз Умаров уч нафар ҳимоячи ва дарвозабонни доғда қолдириб, жамоадошиниқ улай позицияга чиқарди. Игорь Стасевич легионеримиз яратиб берган имкониятни бой бермади ва бўш қолган дарвозани ишғол қилди.

Ўз мухлислари кўз ўнгида “Қизил-Жар” ҳужумни янада кучайтирди ва танаффусгача яна ҳисобда олдинга чиқиб олди.

“Турон” мураббийлар штаби ўйинни ўзгартириш мақсадида 57-дақиқада майдонга Беҳруз Асқаровни туширди. Айнан 22 ёшли легионеримиз учрашув қаҳрамони бўлди.

Беҳруз баҳсга қўшилганидан ўн дақиқа ўтиб, боши билан супергол уришга муваффақ бўлди. Бу истеъдодли футболчимизнинг Қозоғистон чемпионатидаги дебют голи бўлди.

Асқаров бу билан кифоялангани йўқ. Жамоасининг ҳужумларини ташкил қилишда жонбозлик кўрсатди. Ниҳоят, учрашувнинг охирги дақиқаларида бир пас билан жамоадоши Лука Загурскийни дарвозабон билан бирга бир вазиятга чиқарди. Россиялик ҳужумчи қулай вазиятдан унумли фойдаланиб, ғалаба тўпини киритди.

“Турон”даги қолган уч нафар легионеримиз – Шаҳбоз Умаров, Одилбек Абдумажидов ҳамда Хуршид Мухторов бу беллашувда тўлиқ ҳаракат қилди.

Ғалабадан сўнг туркистонлик жамғарилган очколар сонини олтитага етказиб, яна юқори ўринлар учун курашга қўшилди.

Энди легионерларимиз жамоаси чемпионатнинг бешинчи турида ўз мухлислари гувоҳлигида кучли клублардан бири – “Астана” футболчиларини қабул қилади. Бу беллашув 19 апрелга белгиланган.   

Раньери Шомуродов ёрдамида “Ювентус” ҳимоясини ёриб ташламоқчи!

Пьянич Файзуллаевга “Барса”га ўтиш йўлини ўргатди

“Манчестер Юнайтед” афсонаси Рой Кин Ҳусановни келажакда нималар кутаётганини айтди

Агент Файзуллаев Европага қачон кетишини айтди. Манзил фақат ТОП-ЛИГА!

Файзуллаевнинг “Бенфика”га трансфери барбод бўлган. Сабаби аниқ...