Суперклуб “Реал” футболчиси трансфери бўйича иш бошлади

Мадриднинг “Реал” жамоаси марказий ҳимоячиси Хоан Мартинес фаолиятини Франциянинг энг бадавлат клуби “Пари Сен-Жермен”да давом эттириш имкониятига эга бўлди.

Париж грандининг стратегик маслаҳатчиси Луиш Кампуш 18 ёшли футболчини сотиб олишга қизиқиш билдирган.

Marca маълумотига кўра, ПСЖ “Кастилья”да ўйнаётган ёш испан футболчисини бир неча ойдан бери кузатмоқда ва уни клубнинг янги стратегиясига жуда мос, деган хулосага келди. Бу стратегия суперюлдузлардан воз кечиб, ёш иқтидорларга таянишни назарда тутади.

Мартинесни олиб кетиш қийин бўлади, чунки “Қироллик клуби” ҳам ўз тарбияланувчисининг иқтидорига ишонмоқда ва уни сотишни истамайди.

Ўйинчининг “Реал” билан шартномаси 2029 йилгача амал қилади, товон пули эса, 150 миллион евро миқдорида белгиланган.