Суперклубда ўзини кўрсата олмаган юлдузни бешта клуб сўраяпти

Англия Премьер-лигасида “Челси” шарафини ҳимоя қилаётган ҳужумчи Лиам Делап жорий мавсум якунланганидан кейин ёзги трансферлар даврида жамоадан кетиши кутиляпти.

Caught Offside нашри маълумотига кўра, Лондон клуби форвардни сотиб юбориш вариантларини кўриб чиқиш бўйича якуний қарорга келди.

Айни пайтда англиялик форвардни ўз сафига қўшиб олишга “Ньюкасл”, “Брайтон”, “Сандерленд” ва “Эвертон” қизиқиш билдирмоқда.

Агар Делап арзонлаштирилган нархда трансферга қўйилса, уни 2025 йилда сотиб олмоқчи бўлган “Манчестер Юнайтед” ҳам трансферга бўлган қизиқишини қайта тиклашга тайёр.

Лиам Делап 2025 йилнинг ёзида “Ипсвич”дан “Челси”га 35 миллион евро эвазига кўчиб ўтган эди. Унинг шартномаси 2031 йилнинг 30 июнигача амал қилиши белгиланган.

“Челси”даги дебют мавсумидаёқ Лиам Делап “аристократлар” кутган самарадор ўйинчи бўлиб чиқмади. У барча мусобақаларда 24 та ўйин ўтказиб, икки гол урди ва тўртта голли узатма берди холос.