Суперкомпьютер ЖЧ-2026 ғолиблиги учун янги асосий даъвогарни аниқлади

Статистик таҳлиллар билан шуғулланувчи Opta компанияси футбол бўйича жаҳон чемпиони бўлиш эҳтимоли энг юқори жамоани қайта ҳисоблаб чиқди. Компаниянинг маълумотларига кўра, янгиланган рейтингда етакчиликни Франция терма жамоаси қўлга киритган.

Opta ҳисоб-китобларига кўра, французларнинг жаҳон чемпиони бўлиш эҳтимоли 15,7 фоизга баҳоланган. Иккинчи ўринни 12,3 фоизлик кўрсаткич билан Англия терма жамоаси эгаллаган. Шу билан бирга, амалдаги жаҳон чемпиони Аргентина ҳам худди шу кўрсаткич билан кучли учликни якунлаб турибди. Илгариги прогнозларда етакчи бўлган Испания эса бу сафар 12,1 фоиз натижа билан тўртинчи поғонага тушган.

Кучли ўнликка шунингдек Германия, Португалия, Бразилия, Норвегия, Нидерландия ва Колумбия терма жамоалари ҳам кирган. Уларнинг жаҳон чемпиони бўлиш эҳтимоли 6,4 фоиздан 2,8 фоизгача бўлган оралиқда баҳоланмоқда.