Суперлига 8-турнинг тўлиқ тафсилотлари
Ўзбекистон чемпионатида 8-тур учрашувлари бўлиб ўтди. Етти ўйиннинг бирортасида меҳмонлар ғалаба нашидасини сура олишмади. Амалдаги чемпион ва жорий мавсум пешқадами очко йўқотишди.
8-турнинг марказий учрашуви сифатида эътироф этилган “Пахтакор”- “Навбаҳор” баҳсидан кейин ҳар икки жамоа устозлари ҳакамларнинг хатоларидан нолишди. ЎФА ҳакамлар ва назоратчилар департаменти ушбу ўйинни бошқариб борган рефери Зокир Қодиров ва ён ҳакам Руслан Самандаров қўпол хатоларга йўл қўйганини эътироф этиб, Зокир Қодировни Суперлиганинг 3 та ўйинига, Руслан Самандаровни эса номуайян муддатга четлатди. Бекободдаги учрашувда камдан-кам кузатиладиган ҳолат рўй берди. Бош ҳакам Азиз Асимов жароҳат олгани боис унинг ўрнини Фарруҳ Янсупов эгаллашига тўғри келди.
СЎҒДИЁНА – АНДИЖОН 2:1
Учрашув бошларида Ойбек Қиличев чамаси 25 метрлардан кучли зарба билан "Сўғдиёна" дарвозабонининг ҳушёрлигини синаб кўрди, лекин ноаниқ. 23-дақиқада Элёр Орифов жаримадан йўллаган тўпни Руслан Матниёзов эгаллаб олди.
Ўйиннинг учдан бир қисми ўтиб бораётганда, Сирож Мелиев ўнг қанотдан жарима майдонига узатган тўп Ҳусиновга тегиб дарвозага кириб кетаётганда, Матниязов ажойиб сейв намойиш этди. Бироқ қайтган тўпни Шоҳруз Норхонов осонгина тўрга қўллади - 1:0.
Тайм охирларида Норхоновнинг пасидан кейин Даниэль Насриддинов жарима майдонига кириб бориб гол урди - 2:0.
68-дақиқада ҳисоб қисқарди. Ойбек Қиличев жарима зарбасидан тепган тўпни Ширинбой Абдуллаев қайтарди, посбонга яқин жойда турган Шаҳбоз Убайдуллаев дарвозани ишғол қилди - 2:1.
Беллашувда гол бошқа урилмади ва "Сўғдиёна" 2:1 ҳисобида ғалаба қозонди.
Голлар: Шоҳруз Норхонов 31, Даниель Насриддинов 42, Шаҳзодбек Убайдуллаев 68
“Сўғдиёна”: Ширинбой Абдуллаев, Искандар Шойқулов, Элёр Орифов, Кахи Махарадзе, Санжар Рашидов (Давронбек Умиров, 74), Сирож Мелиев (Ойбек Нурматов, 70), Шохруз Норхонов, Шерзод Шакиров, Даниель Насриддинов (Нуриддин Ҳасанов, 81), Никола Милинкович, Шаҳбоз Жўрабеков.
Захира: Милан Митрович, Иззатилла Абдуллаев, Жамшид Болтабоев, Мурод Ражабов, Саҳоб Рашидов, Диан Талхатов.
“Андижон”: Руслан Матниязов, Бобир Аманов, Фарҳод Мираҳматов (Сардор Сулаймонов, 90), Ойбек Қиличев (Абдураҳмон Абдулҳақов, 80), Фарҳод Бекмуротов, Шаҳзод Убайдуллаев, Илдар Маматказин, Шаҳбоз Жумабоев, Асрор Гафуров, Аброр Ҳусинов, Бобир Акбаров (Дониёр Исмоилов, 46).
Захира: Виталий Мирний, Иброҳим Отахонов, Радосав Алексич, Усмонали Исмоналиев, Дониёр Абдуманнопов, Хушнуд Авилов.
Огоҳлантиришлар: Даниель Насриддинов 61, Асрор Гафуров 81.
2770 томошабин.
Илдар Сакаев: - Бир-бирига ўхшамаган икки хил таймларни ўтказдик. Биринчи бўлимда оддий хатоларга йўл қўйдик ва улар дарвозамиз ишғол этилишига олиб келди. Танаффусдан сўнг эса ҳаракатларимиз анча қовушди. Ғалабанинг асосий тамал тоши – бу ҳимоядаги мустаҳкам ва ишончли ўйиндир. Сафарда тўп тепганимиз боис мезбонлар ҳужумга кўпроқ ўтиши тайин эди. Биз эса ҳимояда хато қилмаслигимиз лозим эди. Натижага мен жавобгарман, шундай экан бугунги мағлубиятдаги айб менинг зиммамда.
Улуғбек Бақоев: - Бугун гарчи ғалабага эришган бўлсак-да, нимагадир намойиш этаётган ўйинимиздан тўлиқ қониқиш хосил қилмаяпман. Шу сабабдан ишлашда, хатоларимизни бартараф этишда давом этамиз. Кейинги турларда сифатли, чиройли ўйин кўрсатишга уринамиз. Бугун майдонда тер тўккан йигитлардан миннатдорман.
НАСАФ – ҚИЗИЛҚУМ 1:1
"Насаф" Қаршида "Қизилқум"ни қабул қилди. Қизғин ва муросасиз кечиши кутилган баҳс акси бўлди. Ҳар икки томоннинг ноаниқ ҳаракатлари билан бошланган беллашувнинг биринчи таймида хавфли вазиятлар деярли содир этилмади.
Танаффусдан сўнг эса жамоалар ўйинни кўтаринки руҳда бошлашди. 50-дақиқада меҳмонлар таркибидан Мурод Бобожонов ҳисобни очди.
Ўтказиб юборилган голдан кейин қаршиликлар ўзларини йўқотиб қўйишмади ва дарҳол жавоб беришди. Бу вазиятда Ҳумоюн Муртазоев томонидан киритилган гол эвазига ҳисоб 1:1 кўринишга келди.
Қолган вақт мобайнида ҳар икки жамоа аъзолари ҳарчанд уринишмасин, ғалаба қозониш ҳеч кимга насиб этмади.
Голлар: Мурод Бобожонов 49, Ҳумоюн Муртазоев 51
“Насаф”: Абдувоҳид Неъматов, Ғолиб Ғайбуллаев, Азизжон Ғаниев, Дилшод Саитов, Ҳумоюн Муртазоев, Дониёр Нарзуллаев (Ойбек Бозоров, 46), Бобир Давлатов (Ислом Рашидхонов, 80), Сардор Абдураимов, Ислом Кенжабоев (Шароф Мухитдинов, 70), Хуршид Мухторов, Умарбек Эшмуродов.
Захира: Умиджон Эргашев, Сардор Саъдуллайев, Хусниддин Алиқулов, Алишер Юсупов, Акмал Мозговой, Худоёрхон Сағдуллайев.
“Қизилқум”: Артём Макосин, Эркин Бойдуллаев, Мурод Бобожонов (Алишер Саноев, 62), Салим Мустафоев, Элдор Бойматов, Муҳсинжон Убайдуллаев, Шерали Жўраев, Элгужа Григалашвили (Миржалол Қосимов, 82), Хуршид Олимов (Ҳумоюн Абдуалимов, 86), Мақсуд Каримов, Ариагнер Смит Медина.
Захира: Акмал Рустамов, Азизбек Усмонов, Сардор Жаҳонов, Сухроб Ярашов.
Огоҳлантиришлар: Муҳсинжон Убайдуллаев 38, Ҳумоюн Абдуалимов 89, Азизжон Ғаниев 90+3, Ариагнер Смит Медина 90+5.
14253 томошабин.
Ҳамиджон Актамов: - Ўйин жуда қизиқарли, томошабоп бўлди. Бир қанча вазиятлардан фойдалана олмадик, акс ҳолда уйга уч очко билан кетардик.
«Насаф» клуби асосан ёшлардан таркиб топган яхши жамоа. Уларнинг академиясига ҳар доим ҳавас қилганман.
Бу баҳсда 2 очко йўқотдик деб ўйлайман. «Қизилқум» ҳали инқироздан чиқиб кетмади, кўп ишлашимиз керак. Ҳимоя секин-аста яхшиланиб боряпти. Олдин кўп хато қилардик, ҳозир ижобий томонга ўзгариш бўляпти.
Медина? У ҳали чемпионатимизга мослашиб кетолмади. Келганига энди 2 ой бўлди холос.
«Қизилқум» Суперлигадаги ёши энг катта жамоа, уни қачон яшартираман? Йўқ, янглишяпсиз, бу эски статистика. Бу йил таркиб анча ёшарди.
Рўзиқул Бердиев: - Бугун рақиб жуда яхши ўйнади. «Қизилқум» бизга имконият бермади. Икки очко йўқотдик.
Аввалги турларга нисбатан пассив ҳаракат қилдик? Буни мавсумдан олдин ҳам билганман. Чунки жамоамиз ёш, шу туфайли барқарорликка эришиш қийин.
Муртазоев ҳужумда ёлғизланиб қоляпти? Албатта, икки форвард билан ҳаракат қилишимиз мумкин эди. Аммо, Бобир Абдиҳолиқовнинг жароҳати бор. У сафга қайтса, ҳужумимиз кучаяди.
Тажрибали футболчиларни жалб этиш? Аввало, буни амалга ошириш учун 1-давра тугаши керак, молиявий имконият бўлиши лозим. Бундан ташқари, бу ишни мавсум бошида қилиш шарт, чунки янги футболчилар сафимизга мослашиб кетиши учун вақт талаб этилади.
Азизжон Ғаниевнинг ўйини? Жароҳатидан сўнг ҳали аввалги даражасига чиқолмади. Чунки у 6 ой футбол ўйнамади, бу табиий ҳол.
Кенжабоевни Мессига қиёслашган эди, аммо унинг ўйини пасайди? Билмадим, бизда Месси даражасидаги футболчи йўқ, у билан таққослаш ноўрин. Охирги турларда Ислом яхши ҳаракат қилди, бугун эса дарвозадан сал узоқроқда ўйнади, шу туфайли уни алмаштирдим.
ДИНАМО – АГМК 1:0
Самарқандда АГМК жамоасини қабул қилган мезбонлар ғалаба қозониб, 3-ўринга кўтарилишди.
Дастлабки таймда ўйин назорати “Динамо” қўл остида бўлса-да, майдон эгалари қатор голли вазиятлардан фойдалана олишмади. Танаффусгача Даврон Файзиев шогирдларида ҳам, Миржалол Қосимов жамоасида ҳам ҳисобни очиш имконияти бор эди.
Иккинчи бўлимда Сардор Эминовнинг ажойиб пасидан сўнг Шоҳруҳ Абдураҳмонов чиройли голи билан ҳисобни очди.
Баҳс эрта ўтказилганлиги учун иссиқ об-ҳавода тўп тепиш футболчиларга бироз қийинчилик туғдирди. Натижада қолган вақт мобайнида ўйинчилар шиддатлироқ ҳаракат қила олишмади ва Шоҳруҳ Абдураҳмоновнинг голи ягоналигича қолди.
Гол: Шоҳруҳ Абдураҳмонов 48
“Динамо”: Ботирали Эргашев, Миркомил Лоқаев, Ҳакимхон Аъламхонов, Жасур Азимов, Қадамбой Нурметов (Амиржон Сафаров, 66), Бобур Қосимов, Аббос Шодмонов (Воҳид Шодиев, 73), Сардорбек Эминов (Дамир Темиров, 90), Жасурбек Ўринов, Ихтиёр Тошпўлатов, Шоҳруҳ Абдураҳмонов.
Захира:
АГМК: Низомиддин Зиёвутдинов, Дилшод Жўраев, Зафар Полвонов, Муроджон Тошматов, Мирғиёс Сулаймонов, Ғулом Ҳайдар Ғуломов, Миролюб Костич (Жасур Ҳасанов, 55), Сайдулло Раҳматов, Сардор Раҳмонов (Шаҳзодбек Нурматов, 60), Бобурбек Юлдашев (Шерзод Файзиев, 68), Камрон Саидазимов.
Захира: Акбар Тўраев, Миржамол Қосимов, Санъат Шихов, Шоҳназар Норбеков, Жасурбек Ҳакимов, Шаҳбоз Умаров.
Огоҳлантиришлар: Сайдулло Раҳматов 20, Воҳид Шодиев 90+2
7772 томошабин.
Миржалол Қосимов: - Об-ҳавонинг иссиқлигига қарамай, биринчи таймда анча жонли учрашув гувоҳига айландик. “Динамо” ҳам, АГМК ҳам мухлислар кутган ўйинни кўрсатишга интилди. Афсуски, яна йўқ жойдан дарвозамиз олдида тўпни йўқотдик ва гол урилди. Якунда мезбонлар ҳимояда яхши ўйнашди ва ғалабани сақлаб қолишди.
Аввалги турда “Сурхон”га қарши ҳаракат қилган таркиб, ёмон ўйин кўрсатмагани учун ротация қилиб, ушбу таркибга ишонч билдиргандим. Жасур Ҳасановни иккинчи бўлимда майдонга туширишни режалаштиргандим. Қолаверса, кутилмаганда Бобурбек Юлдашев алмаштиришни сўраб қолди, акс ҳолда Санъат Шихов беллашувга қўшиларди.
Самарқандга фақат ғалаба учун келгандик. Аммо футбол шундайки, ким хато қилса ва бундан қайси жамоа унумли фойдаланса, ўша ғалаба қозонади. Шунинг учун ёш болаларга хос хатоларга йўл қўймаслик лозим.
Вазифаларимиз ўзгармади. Мақсадимиз ҳар ўйинда чиқиб чиройли ўйин билан ғалаба қозониш.
Даврон Файзиев: - Аввало, барчани Рамазон ойи ва “9 май - Хотира ва қадрлаш куни” муносабати билан табриклайман.
Учрашув курашларга бой ва тенгкурашлар остида ўтди. Биринчи таймда иссиқ ҳаво икки жамоага ҳам таъсир қилди. Танаффусдан сўнг эса натижа учун ўйнадик. АГМКга ҳурматни сақлаган ҳолда айтишим мумкинки, “Динамо” ғалабага ҳақли эди, деб ўйлайман. Яъни, ўйин ва вазиятлар борасида устунликка эришдик. Турнир жадвалида юқорилагансак-да, жўжани кузда санаймиз. Натижалар тасодифан қўлга киритилмаётганини исботлашимиз лозим. Қувонарлиси, мавсум бошланиш арафасида “Динамо” ҳақида салбий фикрлар янграётганди, бугунга келиб футбол оммасининг фикрини ўзгартира олдик. Биз ҳақимизда ижобий гаплар айтилаяпти.
Футболчиларимни жуда яхши биламан. Ғалабалар кетидан йигитларнинг оёғи ердан узилишига йўл қўймайман. Уларга доим уқтириб келаман, ким эдингу, ким бўлдинг, олдинга ҳар бир қадам қўйганингда, кечаги кунингни эсла деб. Агар бирор футболчимни осмонда юрганлигини кўрсам, демак у тезда жамоадаги ўрнини йўқотади. Ўйинчининг ўзгаришини машғулотдаги ҳаракати, кўчадаги юриши, саломлашишидан сезса бўлади. Шу боис, шогирдларимдан доим оддийликни сўрайман. “Динамо”да ўйин тақдирини бир ўзи ҳал қиладиган юлдуз йўқ, аммо меҳнаткаш жамоа бор. Биз мана шу қора меҳнатимиз эвазига ўйнашда давом этамиз.
ПАХТАКОР – НАВБАҲОР 2:2
"Пахтакор" Тошкентда муҳим очколарни йўқотди.
"Навбаҳор" билан учрашувнинг илк бўлимида тўлиқ устунлик “Пахтакор” жамоаси тарафида бўлди. 20-дақиқада Драган Черан боши билан аниқ зарба бериб ҳисобни очди. Бу вазиятда унга тўпни Фарруҳ Сайфиев аниқ етказиб берганди. Бўлим охиригача Черан ва Машариповнинг хавфли уринишлари ёдда қолди.
53-дақиқада “пахтакорчилар”нинг навбатдаги ҳужумларидан бирида Достонбек Ҳамдамов жарима майдончаси ичига ёриб кираётган пайтда ҳимоячилар тўпни қайтаришди ва Ҳамдамов йиқилди. Бош ҳаками Зокир Қодиров ўша вазиятда мезбонлар футболчисига нисбатан қўполлик ишлатилган деб топди ҳамда наманганликлар дарвозасига 11 метрли жарима зарбаси белгилади. Пенальтини Драган Черан аниқ амалга ошириб, дублини нишонлади.
Орадан ҳеч қанча вақт ўтмай, Остон Ўрунов фарқни кичик кўринишга келтирди. Аббос Ғуломов чап қанотдан оширган тўпни Остон Ўрунов кучли зарб билан дарвозага аниқ йўллади.
82-дақиқада “лочинлар” мувозанатни тиклашди. Остон Ўрунов ўнг қанотдан мезбонларнинг 2 нафар футболчисии алдаб, тўпни жарима майдончаси ичида қулай вазиятда турган Абдужамол Исроиловга оширди. Исроилов эса боши билан Санжар Қувватов қўриқлаётган дарвозани ишғол қилди.
Кейинроқ баҳсли вазиятлар юзага келди. Улардан бирида “Пахтакор” вакиллари тўпни ён чизиқдан ўйинга киритган ҳолатда ёрдамчи ҳакам офсайд дея байроқ кўтариши унинг савияси қай даражада эканини кўрсатиб қўйди. Охирги дақиқаларда ўйин тизгини реферилар томонидан қўлдан чиқариб юборилди.
Маълумот ўрнида, "Пахтакор" – "Навбаҳор" учрашуви ЎФА ҳакамлар ва назоратчилар департаменти ходимлари ҳамда мутахассислар иштирокида таҳлил қилинди. Унга кўра ўйинни бошқариб борган рефери Зокир Қодиров ва ён ҳакам Руслан Самандаров қўпол хатоларга йўл қўйгани аниқланди ва улар Суперлига баҳсларидан четлатилди. Жумладан, бош ҳакам Зокир Қодиров 3 та ўйинга, ён томондаги рефери Руслан Самандаров эса номуайян муддатга четлатилди.
Голлар: Драган Черан 20, пенальти 53, Остон Ўрунов 59, Абдужамол Исроилов 82
“Пахтакор”: Санжар Қувватов, Ҳожиакбар Алижонов, Жалолиддин Машарипов, Драган Черан, Егор Кримец, Достонбек Ҳамдамов, Одилжон Ҳамробеков, Марат Бикмаев (Игорь Сергеев, 75), Сардор Собирхўжаев, Фарруҳ Сайфиев, Марко Симич.
Захира: Элдор Суюнов, Акрамжон Комилов, Алишер Салимов, Жаҳонгир Аҳмадов, Шоҳруҳ Маҳмудҳожиев, Шерзод Аъзамов, Владимир Козак, Собит Синдаров.
“Навбаҳор”: Ўткир Юсупов, Славко Лукич (Обид Жўрабоев, 42, Шаҳзод Шайманов 90+2), Остон Ўрунов, Азим Аҳмедов, Иван Соловьёв, Александр Касьян, Мирзоҳид Ғофуров, Игорь Голбан, Абдужамол Исроилов, Жаҳонгир Меҳмонов, Аббос Ғуломов (Азиз Ибрагимов, 78).
Захира: Дилшод Ҳамроев, Мирзоҳид Маматхонов, Баҳодир Насимов, Ҳожиакбар Юнусов, Ғиёсжон Комилов, Зафар Тўраев.
Огоҳлантиришлар: Славко Лукич 29, Александр Касьян 36, Абдужамол Исроилов 45, Иван Соловьёв 49, Егор Кримец 62, Фарруҳ Сайфиев 68, Ўткир Юсупов 90+4, Ҳожиакбар Алижонов 90+5, Мирзоҳид Ғофуров 90+5.
11727 томошабин.
Андрей Канчельскис: - Жамоамнинг кўрсатган ўйини ва учрашувга бўлган муносабатидан кўнглим тўлди. "Пахтакор" билан баҳсда иккита тўп фарқини йўққа чиқариш қадри баланд. Футболчиларга қойил. "Навбаҳор" иккинчи таймда кичик мўъжиза содир этди. Дастлабки 45 дақиқаликда шогирдларим асабийлашишди. Турнир жадвалидаги ҳолат ҳам беллашув аҳамиятини ошириб юборганди. Шунинг учун баъзи футболчилар баҳсга керагидан ортиқ тайёрланиб юборишгани туфайли ҳаракатлари қовушмади. Танаффусдан кейин жамоа ўзига келди ва характер намойиш этди.
Мавсумни дайдиларга ўхшаб бошлагандик. Шаҳарма-шаҳар юриб, гоҳ Тошкентда, баъзан Фарғонада тўп тепдик. Ўзимизнинг майдон, стадион етишмаётганди. Уйга қайтганимиздан кейин жамоамиздаги муҳит ва ўйин барқарорлашди. Бу эса натижани яхшиламоқда.
Мен ҳамма нарсани тушунаман. Лекин биринчи бўлимда ҳакамларнинг "Пахтакор"га ёрдам бериши, билмадим, агарда мезбонларга реферилар ҳам кўмаклашишса, унда улар билан курашиш янада қийинлашади. Биринчи бўлимда майдон эгаларига бирорта ҳам огоҳлантириш кўрсатмай, бизга 3-4 та сариқ карточка берилди. Аслида эса рақиб ташкил этилаётган ҳужумларимизни тўхтатиб қолган вазиятлар кузатилганди.
Лукич бугунги ўйинга киришиб кета олмади. Барчада бу каби ҳолат руй беради. Камига огоҳлантирилди. Шу боисдан уни алмаштирдим. Рақиб ҳам айнан ўнг қанот ҳимоямиздан кўпроқ ҳужумга ўтиб, ўша ерда устунликка эришди. Гол Лукичнинг ҳудудидан юзага келди.
Шота Арвеладзе: - Қизиқарли тўқнашув юзага келди. Азарт, кескинлик ва шиддат юқори бўлди. Чемпионат етакчилари беллашди, вазиятлар, сариқ карточкалар ва голлар. Бу ҳафта нафақат "Пахтакор" учун, балки "Барселона" ва "Аякс" учун ЕЧЛда аламли воқеалар содир этилди. Албатта, бу ачинарли. Алам қилгани шуки, рақибда деярли юз фоизлик вазият юзага келмади. Ҳисоб 2:0га айлангач жамоа бўшашди.
"Навбаҳор"ни қўллаш учун келган наманганлик мухлисларни ҳам алоҳида эътироф этиш лозим. Улар ўйин охиригача ўз суюклиларини тинимсиз олқишлаб туришди.
Жорий мавсумда илк бор ғалабани қўлдан чиқарганимизга асосий сабаблардан бири, бу рақибнинг муносиб қаршилиги. Шунингдек, жуда эрта бўшашиб, ўйин тизгини қўлдан чиқардик. Натижага ўйнашни бошлаб юборгач, кўпроқ ҳимояга эътибор қаратдик. "Навбаҳор" эса биринчи голни уриб олгач тезда ўйинга қайтди. Балки жамоамизга қийин режим ҳам ҳалақит қилгандир. Чунки ҳар 4-5 кунда майдонга тушмоқдамиз. Шунга қарамай юқори даражада тўп тепаётган жамоамизни мақтаб қўймоқчиман. Бу осон эмас.
Бир нарсани тушунмайман, нега ҳакамнинг хуштагидан кейин тўпни тепиб юборган футболчига сариқ карточка кўрсатилса, мухлислар уни сўкишади? Футбол мактабидаги ёш ўқувчи ҳам шундай ҳолат руй берса, унда бу сариқ карточка эканлигини билади. Тўпни ён чизиқдан ўйинга киритсак кимдир хато қилади. Аутдан оффсайд. Лекин биз бундай ҳолатда ҳакамни жўр бўлиб ҳақорат қилмаяпмизку. Ҳамма адашади, хато қилади.
Мен ўз вақтида барча жойларда сифатли майдонлар бўлиши керак деганимда балки кулганлар бўлгандир, аммо жорий мавсумдан вазият яхшиланди. Бошқача йўл билан футбол ўйнаш қийин. Юқори даражадаги сифатли футболни айнан мана шундай майдонда намойиш этилади. Бошқаси эса асфальтда, кўчада ёки залда ўйналади. Жаҳон чемпионати ва Олимпиадага чиқишни истаймиз. Бунинг учун ишлар шу йўсинда давом этмоғи лозим.
Дурангни ғалабадек нишонлаш аслида бу бизга берилган баҳо. "Навбаҳор" характер кўрсатгани алоҳида эътирофга лойиқ. Катта ташаббусга эгалик қилиб, якунда буни бой бердик. "Пахтакор" бугун 2 очко йўқотди, "Навбаҳор" эса 1 очко қўлга киритди.
“БУНЁДКОР”– “ҚЎҚОН-1912”2:1
“Қўқон-1912” жамоаси ушбу мавсумда иккинчи марта Тошкент шаҳридаги ТТЙМИ стадионида меҳмон бўлишди. Мазкур ўйингоҳдаги биринчи учрашув чемпионат стартидаги баҳсга тўғри келганди. Ўша беллашувда “Навбаҳор”га қарши майдонга тушган қўқонликлар дуранг натижани қайд этишганди.
Беллашувни “Бунёдкор” анча фаол бошлашди. 13-дақиқада майдон эгалари пенальти тепиш ҳуқуқига эга бўлишди. Ушбу вазиятда меҳмонлар жарима майдони ичида Жасур Жалолиддиновга қарши қўполлик ишлатишди. Бош ҳакам иккиланмай 11 метрли нуқтага ишора қилди. Ундан эса Хуршид Ғиёсов самарали фойдаланди.
Иккинчи тайм майдонга Нўъмон Ҳасанов шогирдлари ўзгача кайфиятда чиқишди. Аввалига Бердиевнинг йўллаган тўпни ҳимоячилар қайтаришди. Кейинроқ Мираҳмадов жуда қулай имкониятни кўкка совурди. 64-дақиқада меҳмонлар ҳисобни тенглаштиришди. Қувондиқ Рўзиев қанотдан ошириб берилган тўпни Суҳроб Бердиев дарвозасига жойлади.
Баҳс тугашига 5 дақиқа қолганида “қалдирғочлар” ғалаба голини уришди. Вадим Абрамов жамоаси яна пенальти тепиш ҳуқуқига эга бўлди. Бу сафар мезбонлар вакилини дарвозабон қўполлик билан тўхтатиб қолди. 11 метрдан Хуршид Ғиёсов муваффақиятга эришди ва дублни расмийлаштирди.
Голлар: Хуршид Ғиёсов пенальти 13, пенальти 85, Суҳроб Бердиев 64
“Бунёдкор”: Абдумавлон Абдужалилов, Исломжон Қобилов, Анвар Ғофуров, Дилшодбек Аҳмадалиев, Жасур Жалолиддинов (Суҳроб Иззатов, 82), Хуршид Ғиёсов, Жавоҳир Қаҳрамонов (Улуғбек Абдуллаев, 62), Лутфулла Тўраев, Миржаҳон Мираҳмадов (Владислав Нуриев, 70), Санжар Қодирқулов, Нурилло Тўхтасинов.
Захира: Муроджон Зухуров, Сергей Прохоров, Бобур Фарҳодов, Санжар Рихсибоев, Абдулла Абдуллаев, Муҳаммадодил Қаҳрамонов.
“Қўқон-1912”: Боян Кнежевич, Жамшид Ҳасанов (Беҳруз Саъдиллоев, 53), Муҳаммаданас Ҳасанов (Жавоҳир Эсонқулов, 43), Қувондиқ Рўзиев, Ойбек Рустамов, Суҳроб Бердиев, Иқбол Маликжонов (Жасур Ҳасанов, 86), Шаҳбоз Эркинов, Александр Мерзляков, Марко Милич, Мурод Холмуҳаммедов.
Захира: Ислом Абдуллаев, Сарвар Каримов, Тимур Ҳакимов, Аваз Маматхўжаев, Тимур Усмонов, Милош Николич.
Огоҳлантиришлар: Абдумавлон Абдужалилов 33, Муҳаммаданас Ҳасанов 40, Исломжон Қобилов 73, Нурилло Тўхтасинов 76, Жасур Ҳасанов 88, Хуршид Ғиёсов 90+3, Суҳроб Иззатов 90+5.
3284 томошабин.
Виталий Ни (“Қўқон-1912” жамоаси вице-президенти): - Биз ҳар бир ўйинда ғалаба қозониш учун майдонга тушамиз. Бугунги баҳсда ҳам шуни мақсад қилгандик. Иккинчи таймда рақибдан яхши ҳаракат қилдик. Аммо бу футбол, унда шундай мағлубиятлар учраб туради. Ҳисоб тенглашганида бир қатор вазиятларни голга айлантира олмадик. Агар уларнинг биттасида самара келтирганимизда ҳам бугун уч очкога эга чиқардик. Энди кейинги турга хатолардан хулоса чиқарган ҳолда тайёргарлик кўрамиз.
Бугун бизни бутун учрашув давомида тинимсиз қўллаб-қувватлаган мухлисларимизга миннатдорчилик изҳор этамиз.
Вадим Абрамов: - Одатдагидек биринчи бўлимни яхши ўтказдик ва доимгидек иккинчи таймни кўнгилдагидек бошлай олмадик. Натижада дарвозамиз ишғол этилди. Голдан кейин бироз асабийлашдик. Лекин натижани ўзимиз томонга ўзгартириб, ғалаба қозондик. Майдонда борларини бериб ҳаракат қилишгани учун йигитлардан миннатдорман.
«Қўқон-1912» яхши жамоа. Бугун тенг кучга эга рақиблар тўқнашди. Гарчи биз ғалаба қозонган бўлсак-да, меҳмонлардан ўйин борасида устунлик қилдик, дея олмайман. Балки «Қўқон-1912»га ҳали ҳам ўз уйида тўп тепмаётганлиги учун жамоага руҳий томондан таъсир қилаётгандир?!
“СУРХОН” — “БУХОРО” 1:0
Ўйиннинг 20-дақиқасида жарима зарбаси амалга оширилди ва Ҳусниддин Ғофуров меҳмонлар дарвозасини ишғол қилди - 1:0.
49-дақиқада Аъзам Алиевнинг кучли зарбаси жуда хавфли чиқди. Аммо дарвоза ишғол этилмади. Орадан бироз вақт ўтгач, Раҳматулло Бердимуродов йўллаган тўп ноаниқ кетди.
Учрашувнинг учдан икки қисми ортда қолганда, Фирдавс Асадов ҳисобни тенглаштириши мумкин эди. Бироқ Асилбек Аманов тўпни қайтарди.
Баҳс охирларида Аброр Исмоилов бирга-бир вазиятдан фойдалана олмади.
Гол: Ҳусниддин Ғофуров 23
“Сурхон”: Асилбек Аманов, Абдуқаҳҳор Ҳожиакбаров, Аюбхон Нўъмонов (Аббосбек Махсталиев, 67), Раҳматулло Бердимуродов, Шавкат Саломов, Абдул Азиз Юсупов (Шерзод Ҳакимов, 63), Аброр Исмоилов, Владимир Бубанья, Ҳусниддин Ғофуров, Аъзам Алиев (Суҳроб Неъматов, 74), Дарко Станоевич.
Захира: Сардор Қобулжонов, Нажмиддин Нормуродов, Равшан Хурсанов, Убайдулло Холиқулов, Мирзакамол Камолов, Сарвар Солиев.
“Бухоро”: Хуршид Хўжаев, Иван Фатич (Иван Нагаев, 61), Азамат Исроилов, Асадбек Собиржонов (Миржалол Жумаев, 18), Фирдавс Асадов, Жамолиддин Убайдуллоев, Раббим Ҳасанов (Акрам Баҳритдинов, 40), Владимир Баенко, Жаҳонгир Абдумўминов, Артём Кулеша, Достон Ибрагимов.
Захира: Нодир Ашурматов, Саламат Қутибоев, Акобир Тўраев, Беҳруз Шодмонов, Тоҳир Шамсиддинов, Анвар Жўраев.
Огоҳлантиришлар: Асадбек Собиржонов 5, Жамолиддин Убайдуллоев 8, Иван Фатич 36, Владимир Баенко 51, Жаҳонгир Абдумўминов 54, Абдул Азиз Юсупов 61, Шерзод Ҳакимов 85.
5420 томошабин.
Бахтиёр Ашурматов: - “Сурхон” жамоасини ғалаба билан табриклайман. Бугунги баҳс тенгкурашлар остида кечди. Биринчи бўлимни “Сурхон” анча фаол тарзда ўтказди. Иккинчи таймда эса шогирдларим ўз ўйинини топиб олишди, яхши ҳаракат қилишди. Лекин яратилган қулай имкониятлар кўкка совурилди.
Охирги учрашувлардаги салбий натижалардаги айбни мураббий сифатида зиммамга оламан. Энди раҳбарият билан менинг ва жамоанинг келажаги ҳақида гаплашамиз. Балким жамоада ўзгариш қилиш “Бухоро” учун фойдали бўлар.
Андрей Микляев: - Анчагина қийин ва бироз асабий ўйин бўлди. Энг муҳими –жуда қимматли бўлган 3 очкога эга чиққанимиздан жуда ҳам мамнунман. Беллашув қийин ўтгани сабаб ўзимиз ўйлаган барча режаларни ва ҳаракатларни амалга ошира олмадик. Шу жиҳатдан бироз кўнгил тўлмади. Лекин барибир ғалаба қўлга киритилгани кишини хурсанд этади.
“МЕТАЛЛУРГ” — “ЛОКОМОТИВ” 0:0
“Пахтакор”нинг очко йўқотишидан фойдаланиб, “Локомотив” ҳамшаҳарига етиб олиши мумкин эди. Аммо бунга “Металлург” йўл қўймади.
Баҳс бошларида Музаффар Музаффаровнинг кучли зарбаси хавфли чиқди. 17-дақиқада Исломбек Исоқжонов йўллаган тўп устунга тегиб қайтди.
Курашларга бой ўтаётган ўйиннинг 33-дақиқасида Ҳусниддин Ғофуров четлатилди. У тўп учун ҳаводаги курашда рақибига қўполлик ишлатди.
Тайм охирида Исломбек Исоқжоновнинг жаримадан йўллаган зарбасини Илёсов қайтарди. Кейин эса Темурхўжа Абдухолиқов боши билан йўллаган зарбаси ноаниқ чиқди.
Иккинчи тайм бошида футболда камдан-кам учрайдиган ҳолат юз берди. Бош ҳакам Азиз Асимов жароҳат олгани боис унинг ўрнини Фарруҳ Янсупов эгаллади.
85-дақиқада Баҳодир Пардаев дарвозани ишғол қилди. Аммо қанот ҳаками ўйиндан ташқари ҳолатни қайд этиб, голни инобатга олмади.
Шу тариқа, бир неча бор тўсин ва устун нишонга олинган баҳсда ғолиб номи аниқланмади.
“Металлург”: Александр Лобанов, Аббос Отахонов, Исломбек Исоқжонов, Баҳром Абдураҳимов, Зоҳид Абдуллаев, Музаффар Музаффаров (Иброҳим Йўлдошев, 46), Шавкат Муллажонов, Камолиддин Тожиев, Станислав Андреев (Баҳодир Пардаев, 62), Акбар Исматуллаев, Сергей Тумасян (Суҳроб Нуруллоев, 57).
Захира: Зафар Сафаев, Дониёр Усмонов, Худойшукур Сатторов, Шаҳзод Ғофурбеков, Одилбек Абдумажидов, Муҳаммад Исаев.
“Локомотив”: Жавоҳир Илёсов, Анзур Исмоилов, Азизбек Ҳайдаров (Диёржон Туропов, 86), Жамшид Искандеров (Азизбек Амонов, 46), Темурхўжа Абдухолиқов (Филипп Раевац, 68), Ҳусниддин Ғофуров, Ислом Тўхтахўжаев, Йован Жокич, Давронбек Ҳошимов, Олег Зотеев, Арсланмурат Аманов.
Захира: Маъмур Икромов, Сардор Мирзаев, Авазбек Ўлмасалиев, Шуҳрат Муҳаммадиев, Бобур Эргашев, Игорь Йелич.
Огоҳлантиришлар: Олег Зотеев 25, Музаффар Музаффаров 36, Иброҳим Йўлдошев 50.
Четлатиш: Ҳусниддин Ғофуров 33.
6532 томошабин.
Андрей Фёдоров: - Кутганимиздек, учрашув анча қийин ўтди. Бундан олдин Чемпионлар лигаси доирасида баҳс ўтказганимизнинг таъсири ҳам бироз сезилди. Парвоз ва об-ҳаво таъсир кўрсатди. Бугунги беллашувга танлаган тактикамиз ўзини тўла оқлаши учун бизга рақиб дарвозасининг ишғол этилиши етишмади. Жуда кўп яратилган қулай имкониятлар кўкка совурилди. Агар шу вазиятлардан бирортасини ижобий якунлаганимизда, бизга бироз осонлашарди.
Андрей Шипилов: - Бугунги кундаги энг яхши жамоа билан баҳс олиб бордик. Айни пайтда терма жамоамизнинг ўзагини ташкил этувчи футболчилардан иборат мазкур клубнинг барча кучли тарафларини билар эдик. Ўйин бўйича эса биз бугун 3 очкога мос ҳаракат қилмадик. Афсуски, барча ижобий жиҳатларимизни намойиш этолмадик. Қайд этилган натижа адолатли, деб ўйлайман. Аксарият ҳолларда рақиб бир ўйинчи кам экани умуман билинмади. “Локомотив” футболчилари анча эркин тарзда тўп тепишди. Бизнинг ўйинимиз эса унчалик яхши чиқмади. Бунинг сабабларини таҳлил қиламиз ва хатоларни тузатиш устида ишлаймиз.
Комментарии