Суперлига. "Динамо" - "Локомотив": Ўзаро ўйинлар статистикаси билан танишинг

Бугун Ўзбекистон Суперлигаси 5-тур ўйинларига старт берилади. Мазкур турни "Динамо" - "Локомотив" учрашуви бошлаб беради. 

Ушбу ўйин олдидан жамоаларнинг ўзаро ўйинлардаги статистикаси тақдим этилди. Унга кўра, "Динамо" ва "Локомотив" чемпионат тарихида ўзаро 26 марта тўқнаш келган. "Динамо" 11 та ўйинда ғолиб бўлган, 3 та ўйин дуранг ҳисобида якунланган. "Локомотив" "Динамо"ни ҳозирга қадар 12 марта мағлуб этган. Тўплар нисбати "Локо" томонида – 36:40. Ўзаро ўйинларда "Динамо" 36, "Локомотив" эса 39 очкони қўлга киритган.

"Локомотив"нинг ўзаро ўйинларда қозонган энг йирик ғалабаси – 5:1 га тенг. "Динамо"да бу кўрсаткич йирикроқ – 5:0. 2009 йилги баҳсда Азамат Абдураимов бошчилигидаги "Динамо" Илҳом Юнусов, Дэвид Ония, Андрей Акопянц, Эркин Бойдуллаев, Баҳодир Насимовнинг Филимонов дарвозасига киритган голлари эвазига "темирйўлчилар"ни 5:0 ҳисобида мағлуб этган.

"Динамо" сўнгги марта 2019 йилда "Локомотив"ни Самарқандда мағлуб этган. Қадамбой Нурметовнинг дубли "Динамо"га амалдаги чемпион устидан ғалаба келтирганди.

Манба: "Локомотив" ва "Динамо" ПФК матбуот хизмати.