Суперлига футболга хавф солмоқда

Бартомеу янги мусобақа ҳақида фикр билдирганда, кўплаб мухлислар учун бу фантастик фильмдаги воқеани эслатиб юборган эди. Орадан кўп ўтмаган бўлса-да, гранд клублар бу ғояни амалга оширишга тобора яқинлашиб келмоқда.

Яқинда Англиянинг «The Times» нашри янги мусобақа ва унинг регламенти борасида маълумот бериб ўтди. Маълум бўлишича, ушбу турнирда иштирок этгани учун клубларга 350 миллион евродан пул ажратилади. Бу ички чемпионат ва ЕЧЛни қўлга киритишдан келиб тушадиган маблағдан бир неча ўн баробар катта сумма. Шу боис, аллақачон бир нечта грандлар турнирда иштирок этиш истаги билан чиққан. Мусобақа ташкилотчилари эса, 18 варақдан иборат каттагина регламентни ҳам ишлаб чиқди. Унга кўра,  турнирда 20 та клуб иштирок этади. Улардан 15 таси тўғридан тўғри йўлланмаган эга бўлса, қолган 5 таси саралаш орқали аниқланади. Англия клублари орасида биринчилардан бўлиб «Ливерпуль», «Манчестер Сити», «Манчестер Юнайтед», «Челси», «Арсенал» ва «Тоттенхэм» жамоалари мусобақа иштирокчисига айланади. Шунингдек, «Милан» ва «Реал»нинг мусобақада иштирок этиши ҳам аниқ бўлиб улгурган.

«The Times» нашри маълумотни эълон қилган куни ФИФА ва УЕФА расман бу мусобақага қарши эканлигини эълон қилди. Шунингдек, яна 5 та конфедерация ҳам Суперлиганинг ташкил этилишига рози эмаслигини маълум қилди. Футбол оламининг деярли барча раҳбарлари бундай экспериментга қарши. Томонлар ўртасидаги «олов» тобора авж олиб бормоқда.

ФИФА, УЕФА ва шунингдек, 6 та футбол конфедерацияси раҳбарлари биргаликда Суперлига учун оғир зарба берди. Унга кўра, Суперлига ташкил этилса, уни ФИФА ва УЕФА расман тан олмайди. Шунингдек, янги турнирда иштирок этган барча футболчилар ФИФА ва УЕФАнинг бошқа мусобақаларида иштирок этиш ҳуқуқидан айрилади.

ФИФА ўз расмий сайтида футболни ривожлантириш учун улкан ҳажмдаги ишларни олиб борганини таъкидлаб ўтар экан, принципларга содиқ қолиш орқали ушбу спорт турини сайёрадаги биринчи рақамлига айлантирганини қўшиб қўйди.

Бундан аввалроқ эса, УЕФА раҳбари - Александер Чеферин Суперлигани кескин танқид қилди ва бош ташкилотчи сифатида Флорентино Пересни кўрсатди.

adan2

«Флорентино 30 йилдан бери Суперлигани ташкил этиш орзусида юрибди. У футболни тўлиқ жозибадан ва ҳаяжондан айирмоқчи. Унинг учун клуб келтирадиган даромад ҳаммасидан муҳим. Перес футбол учун бегона шахс. У бизнесмен. Шу боис, унга фойданинг қандай йўл билан келишининг қизиғи йўқ. Агар ушбу ғоя рўёбга чиқса, нафақат УЕФА, балки Европадаги барча ички биринчиликлар даҳшатли аҳволда қолади. 20 та клуб ўз бюджетига келиб тушадиган пуллар учун бутун бошли Европа футболини остин-устун қилиб юбориши ҳеч гап эмас».

Дарҳақиқат, Бартомеу айтган сўзлар ўзини оқламоқда. 2020 йилнинг 26 октябрь санасида, собиқ президент «Барселона» янги мусобақада иштирок этади ва бу клуб учун катта даромад олиб келади, деган эди. Бундан кўриниб турибдики, Флорентино Перес Бартомеуни ҳам лойиҳада иштирок этишга кўндирган. Ўз навбатида, «Барса» ҳам бу қозонда бирга қайнашга рози. Аслида, бу проект кеча ёки бугун пайдо бўлгани йўқ. Европанинг гранд клуби эгалари бир неча йиллардан бери шу ҳақида бош қотириб келмоқда. 2018 йилда «Football Leakes» нашри шу мавзу ҳақида каттагина мақола эълон қилган эди. Ўша мақолада турнирда «Арсенал», «Ювентус», ПСЖ, «Бавария» сингари грандлар иштирок этиши аниқ бўлиб улгургани ҳақида маълумотлар мавжуд. Бу мусобақани ташкил этиш мақсадида, клублар 2021 йилнинг сўнггида УЕФАнинг тасарруфидан чиқиши ва ўз шахсий лойиҳасини йўлга қўйиши ҳақида ёзилган эди.

Пандемия сабабли, грандлар анча қийин аҳволга тушиб қолди. Молиявий чекловлар ва мухлисларсиз қолиб кетган стадионлар боис, бу проектга бўлган талаб кескин ошиб кетди. Сўнгги маълумотларга қараганда, 2022 йилдан ушбу мусобақага старт берилади. Турнирни ташкил этиш мақсадида, Ж.П. Морган банкидан 4,6 миллиард фунт кредит олиш кўзда тутилган. Пул ажратаётган банк келажакда телетрансляциялардан келиб тушадиган пуллардан улкан фойда кўришига ишонмоқда. Шу боис, 4,6 миллиард фунт ажратишга тайёр. Эндиликда, клублар Европа чемпионлар лигасидан воз кечиши, бироқ чемпионатдаги фаолиятини давом эттириши лозим. Ана шунда, мусобақа иштирокчилари ўйинлар оралиғида бўш қолиб кетмайди. Рўйхатдан ўрин эгаллаши кутилаётган 20 та жамоанинг ЕЧЛни тарк этиши, УЕФА учун ўнгланиб бўлмас зарбага айланиши ҳеч гап эмас. Клублар ўртасидаги энг нуфузли турнир бир кунда ўз қийматини йўқотиш арафасида турибди.

Я.У

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар