Суперлига. "Олимпик" бир киши кам бўлиб қолган "Металлург"га имкониятни бой берди

Суперлиганинг 13-туридан ўрин олган "Олимпик" - "Металлург" баҳси якунланди. Учрашув бекободликларнинг 1:2 ҳисобидаги ғалабаси билан якунланди.

Дастлаб, 28-дақиқада жарима зарбасидан Жасур Жалолиддинов супер зарба йўллаб, ҳисобни очди. Биринчи бўлим шу тариқа мезбонларнинг кичик устунлиги остида тугади. Иккинчи таймнинг 57-дақиқасида Ҳусниддин Ғофуров майдон марказида қоидани бузгани учун ҳакам томонидан қизил карточка билан жазоланди.

Бир киши кам бўлиб қолган "маъданчилар" 66-дақиқада ҳисобни тенглаштирди: Забиҳулло Ўринбоев ҳам жаримадан аниқ зарба бериб, орадаги тафовути йўққа чиқарди. Владислав Каминин ҳам гол урди, бироқ бу вазиятда ўйиндан ташқари ҳолат бор деб топилди. 

Ўринбоев иккинчи бўлим сўнгида яна бир бор Шукрон Йўлдошев дарвозасини ишғол қилди.

Шу тариқа, "Металлург" сафардан 3 очко билан қайтадиган бўлди.